Ձեր վստահելի աղբյուրը

«Ես ցանկություն չունեմ հանդիպելու Նաիրի Հունանյանին»,-այս մասին  այսօր ԱԺ ճեպազրույցների ժամանակ ասաց «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով պատգամավոր  Արման Բաբաբաջյանի և «Հոկտեմբերի 27-ի» գործով ցմահ դատապարտված  Նաիրի Հունանյանի հանդիպմանը:

«Ես 2002-2012 թթ-ը եղել եմ Արդարադատության նախարարության ՔԿՀ-ներում հասարակական վերահսկողություն իրականացնող դիտորդական խմբի անդամ: Ես բանտում այցելել եմ այսօրվա իշխանության բոլոր ներկայացուցիչներին, որոնք եղել են քաղբանտարկյալ, այցելել եմ հազարավոր դատապարտյալների և կալանավորված անձանց: Բազմիցս եղել եմ Նաիրի Հունանյանի խցի մոտ, բայց երբեք ցանկություն չեմ ունեցել նրան տեսնել։ Եղել է դեպք, որ մամուլը գրել է, թե իբր Նաիրի Հունանյանն այնտեղ չէ, խցի մոտով անցել եմ ու համոզվել, որ այնտեղ է: Բայց ես երբեք  ներս չեմ մտել, որ իրեն հանդիպեմ, քանի որ նման ցանկություն չեմ ունեցել, այսօր էլ չունեմ»,- ասաց Էդմոն Մարուքյանը։

Պատգամավորի բնորոշմամբ՝ իր համար Նաիրի Հունանյանը դահիճ է, դահիճների պարագլուխը։

«Ես վստահ եմ, որ նրա խնդրանքը՝ վաղաժամ ազատ արձակվելու, չի բավարարվելու, քանի որ այս համատեքստում քննարկման առկա է նաև հանրության՝ նման մարդուն հետ ընդունելը»,- նշեց նա։

Էդմոն Մարուքյանի խոսքով՝ ով ուզում է, թող նրա հետ հանդիպի. «Ես 17 տարի անարգել մուտքի հնարավորություն եմ ունեցել, բայց չեմ արել։ Գնամ, դահիճի հետ հանդիպեմ, որ ինչ անեմ»։