Ձեր վստահելի աղբյուրը

Երևանի Եկմալյան փողոցի մի քանի  շենքերի բնակիչների բնակարանները շուրջ 15 տարի առաջ գերակա շահ են ճանաչվել,  մասնավոր բազմաբնակարան շենքեր են կառուցվել այդ հասցեներում, սակայն նրանք մինչ օրս որևէ փոխհատուցում, որևէ բնակարան չեն ստացել: Բնակիչները, շուրջ 28-30 ընտանիք, շարունակում են պայքարել իրենց իրավունքների համար:

«Արդեն 13 տարի է, մենք պայքարում ենք: Հեղափոխությունից հետո սա արդեն 10-րդ նկարահանումն է, մենք կանչել ենք, հրավիրել ենք կառավարությանը, քաղաքապետարանին, թաղապետարանին, բայց միայն արժանացել ենք արհամարհանքի: Հիմա մենք կգնանք և ցույց կտանք մեր բակերի թավշյա բուրմունքը, մենք այս երկրի հպարտ քաղաքացիներն ենք, չէ՞»,-լրագրողներին ասաց տուժած քաղաքացիներից  մեկը:

Նա նշեց, որ իրենք նույնիսկ ներդրող են բերել, սակայն Երևանի քաղաքապետ Հայկ Մարությանը մերժել է:

«Մատնված ենք անտարբերության, ոչ մի աջակցություն: Դիմել ենք ԱԱԾ,  զրո պատասխան, դիմել ենք  դատախազություն, ոչ մի պատասխան: Սա հեղափոխությունն է»,- ընդգծեց բողոքող կինը:

Քաղաքացիները նշում են, որ իրենք կառավարության նիստերի օրերին հավաքվում են կառավարության շենքի մոտ, իրենց մոտենում է Փաշինյանի խորհրդականը, ներկայացնում են իրենց խնդիրը, պատասխանում են, որ՝ «այո, գերակա շահ է, պետք է անպայման փոխհատուցել»:

«Ու չկա»,- նշեցին բողոքող քաղաքացիները: