Ձեր վստահելի աղբյուրը

«Կառավարության` 2020 թվականի մակրոտնտեսական կանխատեսումները բավականին մոտ են ԿԲ-ի կանխատեսումներին։ Շարունակվելու են տնտեսական կառուցվածքի փոփոխությանն ուղղված քայլերը դեպի ավելի արտադրողական ճյուղեր, ինչպիսիք են ծառայություններն ու արդյունաբերությունը։ Վերոնշյալ երկու ճյուղերի համեմատաբար բարձր աճով պայմանավորված` 2020 թ. կանխատեսվել է ՀՆԱ-ի իրական աճ՝ 4,9  տոկոսի մակարդակով»,- «ՀՀ 2020 թ. պետական բյուջեի մասին» ՀՀ օրենքի նախագծի նախնական քննարկումների ժամանակ նշեց ԿԲ նախագահ Արթուր Ջավադյանը։

Նա շեշտեց, որ սպառման իրական աճին նպաստելու է բացառապես մասնավոր սպառման աճը։

«Ներդրումների իրական աճը պայմանավորված կլինի ինչպես պետական, այնպես էլ մասնավոր հատվածի ներդումային ակտիվությամբ։ Արտահանելի ճյուղերի արտադրողականության աճի պայմաններում արտահանումը կգերազանցի ներմուծման իրական աճին, և արդյունքում ընթացիկ հաշվի միտումը կպահպանվի նաև 2020-ին։ Իսկ տարվա համար նախատեսվող բյուջեի պակասուրդը ՀՆԱ-ում կկազմի 2,6 տոկոս»,- ասաց Ջավադյանը։

Ինչ վերաբերում է եկամուտների մասին, նա նշեց, որ շարունակվելու է ստվերի կրճատման միջոցով հարկերի հավաքագրման բարձր տեմպերի ապահովումը։

«Պետական բյուջեի ծախսերը ՀՆԱ-ում կավելանան 2 տոկոսային կետով՝ պայմանավորված կապիտալ ծախսերի զգալի աճի նախատեսմամբ։ Կապիտալ ծախսերը կավելանան 2,2 տոկոսային կետով և ՀՆԱ-ի 5 տոկոսը կկազմեն։ Թեև 2020 թ. պետական պարտքը ՀՆԱ-ում շարունակվելու է նվազել, բայց սպասարկման կշիռը շարունակելու է բարձր մնալ։ Այս պարագայում կարևորվում է պարտքի կառուցվածքի բարելավումը, մասնավորապես՝ արտաքին պարտքի՝ ներքին պարտքով փոխարինումը»,-ասաց նա։