Ձեր վստահելի աղբյուրը

2020 թվականի պետական բյուջեով  ոստիկանությանը նախատեսվում է հատկացնել 64,9 մլրդ դրամ։  Այս մասին ԱԺ-ում 2020 թ-ի բյուջեի նախագծի քննարկմանը հայտնեց Ոստիկանապետի պաշտոնակատար Արման Սարգսյանը։ 2019 թվականին այդ գումարը կազմել է 64,4 մլրդ դրամ։

Թվային տվյալներ ներկայացնելուց հետո, «Լուսավոր Հայաստան» խմբակցության պատգամավոր Անի Սամսոնյանը Սարգսյանից հետաքրքրվեց, թե ինչո՞ւ բյուջեում ոստիկանների օպերատիվ, մասնագիտական կարողությունների վերազինման, վերապատրաստման  համար որևէ հատկացում նշված չէ։

«Որևէ տեղ չկա, որ մենք պետք է կոռուպցիայի դեմ պայքարենք, բայց որևէ տեղ ներառված չէ նաև, որ որևէ մեկին թույլատրված է իրակացնել կոռուպցիոն գործարքներ։ Հետևապես, վերևից սկսած տրված է հանձնարարական՝ առաջին օրվանից հետևել բարեվարքության կանոններին և մոտավորապես այս բնույթի՝ ինչպես կցանկանաք, որ վերաբերվեն ձեզ, նույն տրամաբանությամբ վերաբերվեք քաղաքացիներին։ Խոսքը վերաբերվել է անձնագրային և ճանապարհային ոստիկաններին՝ հաշվի առնելով, որ ծառայություն հենց այս ստորաբաժանումներն են իրականացնում»,- պատասխանեց ոստիկանապետի պաշտոնակատարը։

Նրա խոսքով՝ պետք է լինել հետևողական, պահանջել, որպեսզի որևէ մեկը նույնիսկ մտքով չանցկացնի կոռուպցիոն մեխանիզմներ մշակել. «Մեր ընդհանուր խորհդակցություններին քանիցս նշել եմ, որ ոստիկանությունում ամենից շատ գումար պետք է տանեմ տուն ես՝ նկատի ունենալով, որ ամենաբարձրն իմ աշխատավարձն է: Հետևապես, եթե որևէ մեկն ինչ-ինչ պայմաններից ելնելով, ավելի բարձր վարձատրվի, կամ ինքն իրեն վարձատրի, ուրեմն կան կոռուպցիոն ռիսկեր: Հետևողական ենք լինելու և իրենց նկատմամբ կիրառելու ենք բոլոր տեսակի միջոցները»։