Ձեր վստահելի աղբյուրը

ՀՀ Ազգային ժողովի հանձնաժողովներում այսօրվանից մեկնարկեցին 2020 թվականի պետական բյուջեի քննարկումները:

Առաջին նիստին, որը տեղի է ունենում ֆինանսավարկային հանձնաժողովում, մասնակցում է վարչապետ Նիկոլ Փաշինյանը։

Վարչապետը  ներկայացնելով բյուջեի նախագիծը՝ նախ նշեց, որ 2019 թվականին Հայաստանի տնտեսական աճը կանխատեսվում էր 4,5 տոկոսի մակարդակում, սակայն  եթե նայում են հունվար-սեպտեմբերի տնտեսական ցուցանիշներին, ապա տնտեսական աճի կանխատեսումն այսօր ավելի մեծ է։

«Մենք առաջնորդվում եք առավել պահպանողական սցենարով,  բյուջեի հիմքում դնում ենք ոչ թե ամենալավատեսական կանխատեսումը, այլ՝ որոշակի պահպանողական կանխատեսում՝  ապահովելու համար մակրոտնտեսական կայունությունը»,- ասաց Նիկոլ Փաշինյանը։

Նա նաև նշեց, որ կառավարությունը նույն խնդիրը լուծել է 2018 թ-ին, քանի որ բյուջեի նախագծում 4,5 տոկոս տնտեսական աճի ցուցանիշ էր դրված, բայց ապահովել են  5,2 տոկոս աճ:

«Կարծում եմ, որ  սա ճիշտ մոտեցում է՝ ապահովելու համար առավել կայուն մակրոտնտեսական միջավայր: Մենք առաջնորդվում ենք հայտնի՝ «надейся на лучшее, готовься к худшему» սկզբունքով։ Կարծում եմ՝ այս առումով ճիշտ քաղաքականություն է որդեգրված»,- նշեց Նիկոլ Փաշինյանը։

Վարչապետը ներկայացնելով որոշ ցուցանիշներ՝ ասաց, որ 2019 թվականի  հունվար-հոկտեմբերին  տնտեսության ակտիվության ցուցանիշը կազմել է 7,1 տոկոս։ Ըստ նրա՝ ակնհայտ է, որ  այս տարի տնտեսական աճը կազմելու է մոտ 7%. «Ֆինանսների նախարարությունը տնտեսական աճի հնարավոր ցուցանիշը գնահատում է 6,3%, իսկ ԿԲ-ն՝ 6,7% տոկոս»:

Նիկոլ Փաշինյանի խոսքով՝ միջազգային կազմակերպությունները, մասնավորապես, Արժույթի միջազգային հիմնադրամը, Ասիական զարգացման բանկը, բոլորն, առանց բացառության, վերագնահատել են Հայաստանում տնտեսական աճի վերաբերյալ իրենց գնահատականները՝ բարձրացման միտումով. «Այսինքն՝ նախկինում արված կանխատեսումները փոխել են։ Հիմա ավելի բարձր տնտեսական աճ են կանխատեսում Հայաստանի համար, քան նախկինում»։

Վարչապետը նշեց, որ այս տարվա 10 ամսվա տվյալներով արդյունաբերական արտադրանքի ծավալի աճը կազմել է 9,7 տոկոս, շինարարությանը՝ 4,4 տոկոս, առևտրի շրջանառությանը՝ 8,8, ծառայությունների  աճն էլ կազմել է 15,5 տոկոս: Բացի այդ, 5,9 %-ով ավելացել է միջին ամսական աշխատավարձը:

Ինչ վերաբերում է արտաքին առևտրաշրջանառությանը, ապա, ըստ Նիկոլ Փաշինյանի, արտահանման ծավալը ընթացիկ տարվա 10 ամսվա տվյալներով աճել է  7,9 տոկոս:

«Ընդ որում, տարվա սկզբին մենք խնդիրներ ունեինք արտահանման առումով, մինչև 3 տոկոս կրճատում կար, սակայն այն ժամանակ վստահ էինք, որ այսպիսի ցուցանիշների հասնելու ենք»,- ընդգծեց նա:

Անդրադառնալով սպառողական գների ինդեքսին՝ վարչապետը նշեց, որ նախորդ տարվա համեմատ գներն աճել են 1,6 տոկոսով:

«Տնտեսագետները շատ նեղսրտում են, երբ գնաճը բարձր է լինում, նույնչափ էլ սրտնեղում են, որ այն ցածր է լինում։ Կարծում եմ՝ 1,6%-ն այն ցուցանիշն է, որը մեր տնտեսագետներին որոշակի կոմֆորտ զգալու հնարավորություն կտա»,- ասաց Նիկոլ Փաշինյանը։

Վարչապետի խոսքով՝  խնդիրներ կան գյուղատնտեսական ցուցանիշների հետ կապված: Մասնավորապես, այս տարվա 10 ամսվա տվյալներով գյուղատնտեսական արտադրանքի ծավալը կազմել է 95,2 տոկոս, այսինքն՝ 4.8 տոկոս նվազում է գրանցվել:

«Այստեղ մի նրբության մասին կուզեի խոսել: Գիտեք, որ Հայաստանում կոնյակի սպիրտի ներկրման հետ կապված որոշակի խնդիր ենք ունեցել: Երկար տարիներ կոնյակի սպիրտ է ներկրվել, որը «տեղավորելու» համար շատ դեպքերում  ցույց են տվել խաղողի մթերման ծավալների ոչ այնքան հավաստի ցուցանիշներ։ Հիմա այդ մեխանիզմները փակված են: Ուզում եմ ասել, որ լավ լուր ունենք գյուղատնտեսության ոլորտի հետ կապված, ըստ էության, 10 ամսվա նախնական օպերատիվ տվյալներով՝ բուսական ծագման գյուղմթերքի արտահանման ծավալներն աճել են 15 տոկոսով, կենդանական ծագման արտադրանքի արտահանումը՝ 3,3 տոկոսով»,- ընդգծեց Նիկոլ Փաշինյանը:

Վարչապետը միաժամանակ նշեց, որ «ՀՀ-ում տնտեսությունը շարունակում է ունենալ շատ լավ տրամադրություն»։

«Վերջին տարիներին տնտեսագիտության գլոբալ թրենդն այնպիսին է, որ մարդկանց տրամադրությունը, տնտեսական վարքագիծը համարում են տնտեսագիտական հիմնական գործոն, այսինքն՝ թվերը, հավասարումները, բանաձևերը իրենց տեղը որոշակիորեն զիջում են հանրության տրամադրությանը: Ուզում եմ ասել՝ մեր երկրում տնտեսական բավական բարձր տրամադրություն կա»,- նշեց Նիկոլ Փաշինյանը։