Ձեր վստահելի աղբյուրը

Հայաստանը որևէ կերպ որևէ ուղղությամբ ադեկվատ արտաքին քաղաքականություն չի վարում։ «Ոսկանապատ» վերլուծական կենտրոնի «Փոփոխվող Մերձավոր Արևելքը և Հայաստանի անվտանգային միջավայրը» թեմայով քննարկմանն նման տեսակետ հայտնեց քաղաքական մեկնաբան Կարեն Բեքարյանը։ Նա նշեց, որ ինչպես իշխանությունը չի պատկերացնում՝ ինչ է ուզում ներսում, ինչպես է պատկերացնում ղարաբաղյան հիմնախնդրի կարգավորման գործընթացը, պատկերացում չունի, թե ինչ է ուզում արտաքին աշխարհից  ընդհանուր կամ առանձին վերցրած որևէ մեկից։

Կ. Բեքարյանի խոսքով, այս կամ այն պոպուլիստական քայլերով հանրության որոշ շրջանակում առաջացնում են ոգևորություն, սակայն ժամանակի ընթացքում առաջանում է արտաքին մարտահրավների փունջ, որի տակից դուրս գալը դառնում է ծանր։

Նա, խոսելով BBC լրատվական ծառայության Hard Talk հաղորդմանն ԱԳ նախարար Զոհրաբ Մնացականյանի հարցազրույցի մասին, նշեց, որ նախապես կանխատեսվում էր, որ լինելու է սուր քննարկում՝ հաշվի առնելով հաղորդման ձևաչափն ու նախորդ հաղորդումները։

«Որոշներն ասում են պատրաստված չէր, սակայն հարցը պատրասվածության մեջ չէ, այլ վարվող քաղաքականությունը բացատարելը, հիմնավորելն օր-օրի դառնում է անհնար։ Հետևաբար այդ իրավիճակում  ունեցանք այն արդյունքը, ինչ ունեցանք»,- ասաց Կ. Բեքարյանը։

Նա նշեց, որ կարող է իշխանական թևը հանձնարարություն ստանա ու պաշտպանել Մնացականյանի հարցազրույցը, սակայն հարց է առաջանում՝ դրանից արդյունքը փոխվո՞ւմ է։

«Պաշտպանեցին, փորձեցին ցույց տալ, որ լավ է, հանրության ինչ-որ շրջանակի վրա որևէ ազդեցություն թողեց դա, սակայն դրանից ի՞նչ ունեցավ պետությունը բացի նրանից, որ հերթական անգամ ցույց տվեցինք, որ արտաքին քաղաքական գծերն ամբողջովին մերկ են»,- ասաց Կարեն Բեքարյանը։