Ձեր վստահելի աղբյուրը

ՀՀ վարչապետ Նիկոլ Փաշինյանը հարցազրույց է տվել ռուսական Kommersant պարբերականին՝ անդրադառնալով հայ-ռուսական հարաբերություններում մի շարք կարևոր հարցերի, Սիրիայում հայերի պաշտպանության հարցին, գազի գնին։

Սիրիայում հայերի անվտանգություն

Հարցին, որ Սոչիի պայմանավորվածություններով անդրադարձ է եղել  նաև Սիրիայում հայերի անվտանգությանը, Փաշինյանը նշել է, որ Կամիշլի քաղաքում ապրում է մոտ 3000 հայ։ Նրանց անվտանգության մասին, ինչպես ասել է Փաշինյանը, ինքը խոսել է ՌԴ նախագահ Պուտինի հետ, որպեսզի հաշվի առնվեն մասնավորապես հայերի շահերը, մասնավորապես, Կամիշլիում, քանի որ այդ ժամանակ այնտեղ լարվածությունը շատ մեծ էր ՝ Թուրքիայի ներխուժման պատճառով:

Փաշինյանը շնորհակալություն է հայտնել Պուտինին և հույս հայտնել , որ ձեռք բերված պայմանավորվածությունները կիրականացվեն, և հայերի անվտանգության շահերը կշարունակվեն հարգվել:

«ՌԴ նախագահը խոստացավ ու խոսքը պահեց»,-ասել է Փաշինյանը։

Հայաստանի կենսաբանական լաբորատորիաներ

Խոսելով Հայաստանում կենսաբանական լաբորիատորիաների մասին, որոնք վերազինվել են Պենտագոնի միջոցներով, ու դրանց հասանելիությունը ռուս մասնագետներին, Փաշինյանն ասել է, որ աշխատում են ՌԴ-ի հետ հուշագրի վրա, որը թույլ կտա ռուս մասնագետներին մուտք ունենալ այդ լաբորատորիաներ:

«Անցյալ տարի ռուս մասնագետներին թույլ տրվեց մուտք գործել այդ հաստատություններ ՝ համոզվելու, որ դրանք որևէ սպառնալիք չեն պարունակում Ռուսաստանի համար: Դրանք, ընդհանուր առմամբ, չունեն ռազմական նշանակություն, այլ կենսաբանական լաբորատորիաներ են, որոնք օգտագործվում են զուտ բժշկական նպատակներով»,-ասել է Փաշինյանը՝ հավելելով, որ այդ լաբորատորիաները Հայաստանի սեփականությունն են, ինչը շատ կարևոր է: 

Հարավ-Կովկասյան երկաթուղի

Հարավ-Կովկասյան երկաթուղու աշխատանքի հետ կապված խնդիրների ու այն տեղեկությունների մասին, թե ռուսական կողմը պատրաստվում է վաղաժամկետ դադարեցնել Հայաստանի երկաթուղիների կառավարման վերաբերյալ համաձայնագիրը՝ Փաշինյանն ասել է, որ խնդիրը քաղաքականացվում է լրատվամիջոցների կողմից և այն զուտ տնտեսական խնդիր է, ներդրումների արդյունավետության հարց:

«Մենք ակտիվորեն աշխատում ենք «Ռուսական երկաթուղիներ»-ի հետ, և մենք ունենք նախնական պայմանավորվածություններ, որ կաշխատենք, որպեսզի ՀԿԵ-ի ներդրումային ծրագիրը Հայաստանում ավելի արդյունավետ լինի: Մենք քննարկում ենք այս հարցը մեր ռուս գործընկերների հետ: Ես չեմ ուզում ասել, որ վստահ եմ, բայց համարյա համոզված եմ, որ մենք համաձայնության կգանք»,-ասել է Փաշինյանը, հավելելով, որ  պայմանագիրը վաղաժամկետ դադարեցնելու որևէ նախադրյալ չի տեսնում:

Գազի գին

Գազի գինը, ըստ պարբերականի, ևս մեկ խնդրահարույց հարց է: Բոլորն ակնկալում են, որ գները կբարձրանան, միակ հարցն այն է, երբ` ձմռանը, թե գարնանը:

Փաշինայնը նշել է, որ գազի գնի վերաբերյալ  ռազմավարական դաշնակիցների միջև բանակցություններ են ընթանում, և դա կբերի կոնկրետ արդյունքների:

«Ես դրանում վստահ եմ: Մենք այժմ Հայաստանում շատ լավ դինամիկա ունենք տնտեսության մեջ: Այս հարցը մեզ համար կարևոր է ոչ միայն գազի գների առումով, այլև տնտեսական զարգացման հարց է: Կարծում եմ, մեր ռազմավարական դաշնակից Ռուսաստանի համար կարևոր է, որ գազի գինը լինի այնպիսին, որ չխախտի ՀՀ տնտեսական զարգացման դինամիկան»,-ասել է վարչապետը։

Իսկ թե ո՞ր գինն է, որ  չի խախտի այդ դինամիկան, Փաշինյանն ասել է, որ սա արդեն հաշվարկների խնդիր է, և այժմ զբաղված են այդ հաշվարկներով․ «Որոշումը կլինի դաշնակցային, այլ կերպ չի կարող և չպետք է լինի»:

Վարչապետը նշել է, որ  նախորդ տարվա ընթացքում մեր ներքին գազի գինը չի փոխվել,  իսկ գնման գնի ավելացումը շատ կարևոր չէ Հայաստանի ներսում սպառողների տեսակետից:

«Մեզ համար կարևոր է, որ «Գազպրոմ-Արմենիա»-ի գործերը կարգին լինեն: Մենք պետք է մշակենք այնպիսի բանաձևեր, որ և «Գազպրոմ-Հայաստանի» գործունեությունը լինի արդյունավետ,  և գազի գինը»,-ասել է Փաշինյանը։

Ճշտող հարցին, թե Հայաստանը բանակցում է գնի ընդհանրապես չբարձրացնելու, թե բարձրացնել, բայց ոչ էականորեն, Փաշինյանը կրկնել է, որ բանակցությունները նրա շուրջ են, որ գինը ձեռնտու լինի Հայաստանի տնտեսությանը, որպեսզի չխախտի տնտեսական աճն ու տեմպը, ինչը արտահայտվում է տնտեսական դինամիկայով: Փաշինյանը չի ցանկացել ասել , թե ներկայիս 1000 խմ-ի գազի դիմաց 165 դոլարը խախտում է դինամիկան, թե ոչ, ասելով, որ կարևորը բովանդակությունն է, ոչ թե թվերը։

Ռուսական «ORSIS»  ընկերության հայտի չեղարկում

Պարբերականը հարց է ուղղել ռուսաստանյան «ORSIS»  ընկերության զենքի վաճառքի տենդերի մասնակցության հայտի մերժման վերաբերյալ, Փաշինյանն ասել է, որ սա աննախադեպ բան չէ, մրցույթ է, առաջարկի, պահանջարկի խնդիր է:

«Ոչինչ չկա մեկնաբանելու: Ռազմատեխնիկական համագործակցության ոլորտում Ռուսաստանը Հայաստանի համար թիվ մեկ գործընկերն է: Այնպես որ, այդպես է և այդպես էլ կլինի: Մեկ ընկերության և մեկ գործարքի հետ կապված իրավիճակը, չեմ կարծում, որ այնքան շոշափելի է, որ հիմա պետք է քննարկենք»,-ասել է Փաշինյանը:

Ադրբեջանին զենքի վաճառք

Ադրբեջանին ՀԱՊԿ երկրների կողմից զենք մատակարարելու վերաբերյալ Հայաստանի մշտական ուշադրության հետ կապված Փաշինյանն ասել է, որ սա ՀԱՊԿ-ի արդյունավետության հարց է:

Վարչապետը նշել է, որ Հայաստանի թիվ մեկ նպատակը ԵՏՄ-ում կազմակերպությունն ավելի արդյունավետ դարձնելն է ու ուրախ է, որ ԵՏՄ-ում Հայաստանի նախագահությունը (2019 թ. - «Կոմերսանտ») ստացվեց շատ արդյունավետ:

«Անձամբ ես և իմ կառավարությունը կարողացանք կոնկրետ ներդրում ունենալ, որպեսզի ԵՏՄ-ն ավելի շատ գործընկերներ ունենա ամբողջ աշխարհում: Եվ մենք շարունակելու ենք աշխատել այս ուղղությամբ։ Նույնը վերաբերում է ՀԱՊԿ-ին: Ո՞րն է այստեղ նպատակը․ ամեն ինչ անել, որ կարողանանք ՀԱՊԿ-ը դարձնել անվտանգության համակարգ, որը շատ կարևոր է Հայաստանի, Ռուսաստանի և անդամ այլ երկրների համար, առավել արդյունավետ: Կարծում եմ, որ Ռուսաստանը նույն նպատակն ունի: Ինչ վերաբերում է ՀԱՊԿ-ին, ապա մենք և Ռուսաստանը ընդհանուր նպատակ ունենք: Մենք դրա վրա միասին աշխատում ենք: Սա հեշտ գործ չէ, բայց ես շատ ուրախ եմ, որ այս քննարկումների արդյունքում ՀԱՊԿ-ն իսկապես ավելի արդյունավետ կդառնա Հայաստանի, Ռուսաստանի, և մնացածների համար»,-ասել է Փաշինյանը։

ԵՏՄ-ին Ուզբեկստանի անդամակցություն

ԵՏՄ Ուզբեկստանի մուտքի հետ կապված Փաշինյանն ասել է, որ շատ լավ գործընթաց է և  որպես երկիր, որն այժմ նախագահում է ԵՏՄ-ում, շահագրգռված են խորացնելու համագործակցությունը Ուզբեկստանի հետ: Եթե Տաշքենդը որոշի ԵՏՄ անդամ դառնալ, դա շատ լավ կլինի:

ԵՏՄ-ում կա դիտորդի ինստիտուտ: Առաջին դիտորդ երկիրը Մոլդովան է, իսկ եթե Ադրբեջանն կցանկանա դիտորդ դառնալ,  ինչպիսի՞ն է կլինի Հայաստանի դիրքորոշումը, Փաշինյանն ասել է, «երբ, որ ցանկանա,  այդ ժամանակ էլ կքննարկենք»:

«Ինչպիսին են մեր հարաբերությունները Ադրբեջանի հետ, գաղտնիք չէ: Այս պահի դրությամբ ես ընդհանրապես չեմ ուզում դա քննարկել»,-ասել է վարչապետը:

Արևելք-Արևմուտք ընտրություն

Նշելով BBC-ի «Hard Talk» ծրագրում ՀՀ ԱԳ նախարարի հարցազրույցում հաղորդավարի՝ Հայաստանի կողմից  Եվրոպա, թե ԵՏՄ ընտրության մասին հարցը՝ Կոմերսանտը հարց է ուղղել, թե կարո՞ղ են ԵՏՄ-ն և Եվրամիությունը համագործակցել ինչ-որ կերպ, թե նրանք դատապարտված են հակամարտելու միմյանց հետ, Փաշինյանն ասել է, հոկտեմբերի 25-ին պայմանագիր են ստորագրել Սերբիայի ու ԵՏՄ-ի միջև, որը շատ մեծ հավանականություն կա, որ կդառնա ԵՄ անդամ:

«Մենք՝ Հայաստանը, չենք ընկալում իրավիճակն այնպես, որ պետք է ընտրություն կատարենք Եվրոպայի և Ռուսաստանի միջև»,-ասել է Փաշինյանն ու նշել, Ռուսաստանը մեզ համար եվրոպական երկիր է, եվրոպական քաղաքակրթության անբաժանելի մասն է:

Փաշինյանը նշել է, որ Եվրոպական շատ առաջնորդներ ասում են, որ Ռուսաստանի հետ նորմալ հարաբերությունների հաստատումն իրենց համար առաջնային է:

Վրաստան-Ուկրաինա

Իսկ արդյոք 2008թ․-ին Վրաստանի պատերազմը., 2014 թ.-ին Ուկրաինայի արևելքում առկա հակամարտությունը արդյունք է Ռուսաստանի և Արևմուտքի միջև մրցակցության, Փաշինյանն ասել է, որ չի մեկնաբանի Վրաստանում և Ուկրաինայում տիրող իրավիճակը:

«Ես ուզում եմ ևս մեկ անգամ շեշտել և իսկապես ուզում եմ, որ մեր բոլոր սիրելի ռուսները ֆիքսեն այս փաստը, որ 2018-ին Հայաստանում տեղի ունեցան փոփոխություններ: Տեղի է ունեցել ոչ բռնի, թավշյա, ժողովրդական հեղափոխություն, քանի որ չկար որևէ օտար ուժ, որը ներգրավված լիներ այս գործընթացում: Ոչ մի աշխարհաքաղաքական ֆոն չկար»,-ասել է վարչապետը, հավելելով, որ արտաքին քաղաքականության մեջ ռեվերսներ չկան ու չեն լինի։

Պաշտոնական այցեր ՌԴ և Հայաստան

Փաշինյանը հաստատել է, որ հաջորդ տարվա սկզբին առաջին պաշտոնական այցով կլինի Ռուսաստանում, որից հետո արդեն ՌԴ նախագահ Պուտինը պաշտոնական այցով կգա Հայաստան։ Պայմանավորվածությունը ձեռք է բերվել Երևանում։