Ձեր վստահելի աղբյուրը

«Անկեղծ ասած՝ մեր հասարակությանն այսպես բզկտված դեռ չէի տեսել։ Իրար նկատմամբ թույնով լցված, իրար նկատմամբ մատնություններ անել»,- լրագրողների հետ հանդիպմանն ասաց Հանրային խորհրդի նախագահ Վազգեն Մանուկյանը:

Նա նշեց, որ արժեքավոր մարդկանց, օրինակ ԱԺ նախկին նախագահ Արա Բաբլոյանի, նկատմամբ քրեական գործեր են հարուցում, ուղղակի մարդու զարմանք է առաջանում:

«Մեր լավագույն բժիշկներից մեկի նկատմամբ, մեր պարծանքը, որով հպարտանում ենք աշխարհում, ստորակետի պատճառով՝ ճիշտ է, թե սխալ է դրել,  չեմ էլ իմանում, քրեական գործ են բացում: Արցախի պաշտպանության նախարարին են հանում, իրենց կարծիքով՝ ինչ-որ մի նախադասություն ճիշտ չի ասել, որը լավագույն նախարարներից էր»,- ասաց ՀԽ նախագահը:

Վ. Մանուկյանն ընդգծեց, որ անարժեք մարդիկ հետապնդում են շատ ավելի արժեքավոր մարդկանց, որոնց  ջանքերով այս պետությունն արդյունքների է հասել,  նրանք հիմա գտնվում են հարվածի տակ:

««Հոկտեմբերի 27»-ի գործը… Մի խայտառակություն էլ դա է: Քաղաքական գործ են բացում ամենաամոթալի ձևերով,  անարժան մարդկանց ձեռքերով: Եթե դատական որոշումները վերանայելու հարց կա, խնդրեմ,  պետք է բացել, սկսել նայել, բայց այն, ինչ կատարվում է, խայտառակություն է»,- ասաց նա:

Քաղաքական գործչի խոսքով, այս պայմաններում հասարակությունը պետք է լիներ կոնսոլիդացված, Հայաստանը պետք էր դարձնել ժողովրդավարական մաքուր երկիր:

«Հայաստանի ներկա իրավիճակը չի համապատասխանում այն իրավիճակին, որում այժմ մենք գտնվում ենք: Կարելի՞ է վիճակը լավացնել: Իհարկե, կարելի է, բայց դա իշխանությունից պահանջում է կտրուկ փոխել այն քաղաքականությունը, որ իրենք վարում են երկրի ներսում՝ ազատվել հեղափոխական փրփուրից։ Միշտ հեղափոխությունից հետո փրփուր է առաջանում, լինում են անարժան մարդիկ, որոնք փորձում են պղտոր ջրում ձուկ որսալ։ Կկարողանա՞ անել դա իշխանությունը: Չեմ իմանում: Այս հարցի լուծումը միայն իշխանությունից չի կախված, կախված է նաև հասարակությունից: Հասարակությունն ի՞նչ խնդիրներ է դնում իր առջև, ի՞նչ խնդիրներ է դնում իշխանության առջև, ո՞նց է  կարողանում ազդել իշխանության վրա», - ասաց Վ. Մանուկյանը:

Հանրային խորհրդի նախագահն ընդգծեց, որ Հայաստանի անվտանգությունն էապես կախված է նրանից, թե ինչպիսի ներքին իրավիճակ է Հայաստանում:

Վազգեն Մանուկյանն ասաց, որ համաձայնվեց լինել ՀԽ նախագահ, մտածելով որ նոր իրավիճակում իսկապես կսկսվեն նոր բարեփոխումներ, երկիրը կգնա առաջ, կարող է այդտեղ օգտակար լինել:

«Տեսնում եմ, որ երկիրն այդ ճանապարհով չի գնում: Ինչպես անհամապատասխանություն կա արտաքին աշախարհի և Հայաստանի, այնպես էլ անհամապատասխանություն կա այն խոստումներին, հույսերին, որոնք մեր ժողովուրդը կապում էր իշխանափոխության հետ, և այն ինչ -որ հիմա կատարվում է»,- ասաց ՀԽ նախագահը:

Նա նշեց, որ սուր ելույթներ է ունենում, բայց նաև խորհուրդ է տալիս իշխանություններին, թե ինչ պետք է անել:

«Իշխանությունները եթե համաձայն չեն ինձ հետ, չեն ուզում ինձ տեսնել Հանրային խորհրդի նախագահ, երբեմն ասում են, որ մինչև 2020 թվականի ապրիլի 4-ը իրավունք չունեն հանելու ինձ, նշանակություն չունի, ցանկացած պահ կարող է վարչապետը հրավիրել, ասել, որ մենք միասին չենք կարող աշխատել, նույն պահին դուրս կգամ: Բայց քանի որ այդպիսի հարց է առաջացել, կարող է ես ինքս նախաձեռնեմ մոտ օրերս հանդիպեմ վարչապետին, միասին քննարկենք՝ հետագա գործունեությունն իմաստ ունի՞, թե՞ ոչ»,- ասաց Վ. Մանուկյանը:

Խոսելով իր հիմնադրած «Վերնատուն» հասարակական-քաղաքական ակումբի մասին, նա նշեց, որ ան հարթակ է, որտեղ պետք է հավաքվեն բանիմաց մարդիկ, քաղաքական ուժերի ներկայացուցիչներ, տարբեր հայացքների տեր մարդիկ՝ քննարկելու Հայաստանին վերաբերող հարցեր:

«Ոչ մի առանձին վերացրած կուսակցության չունի այն պոտենցիալը, որպեսզի այն բարդ հարցերը, որոնք կանգնած են հիմա մեր երկրի առաջ, կարողանա լուծել: Ակումբում որոշումներ չեն ընդունվում, մարդիկ հավաքվում, խոսում են: Այդտեղ շատ մարդկանց կարող եք հանդիպել՝ նոր իշխանության կողմնակիցների, դեմ եղողների: Դա ինձ չի հուզում», -ասաց Վ.Մանուկյանը:

Նա նշեց, որ լավ չի հասկանում հների ու նորերի բաժանումը. «Ամեն մարդու պետք է վերաբերվել անհատապես, չասել, որ սրա հետ է եղել, վատ է, սրանց հետ է՝ լավն է»:

Հարցին՝ ինչպե՞ս էիք պատկերացնում Հայաստանը հեղափոխությունից 1,5 տարի հետո, նա նշեց, որ այն, ինչ իրականացավ, հույսեր արթանացան, որ իսկապես կարող են նոր փուլի մեջ մտնել, գնալ առաջ, հասարակությունը կոնսոլիդացվի, մաքուր հասարակություն դառնա, իրար նկատմամբ վստահություն առաջանա:

«Անկեղծ ասած, ես հիասթափվել եմ, որովհետև այդ ճանապարհով չգնացինք ու մինչև հիմա դեռ…
Շատ դժվար է լինելով ընդդիմադիր, հեղափոխական գործիչ՝ դառնալ պետական գործիչ: Այդ անցումը ես դեռ չեմ տեսնում Հայաստանում»,- ասաց Վազգեն Մանուկյանը: