Ձեր վստահելի աղբյուրը

Ամերիաբանկի և Amazon Web services (AWS) համագործակցության շրջանակում Երևանում այսօր մեկնարկեց ScaleUP ինովացիոն ֆորումը, որին մասնակցում էին միջազգային հեղինակավոր ընկերությունների՝ AWS, VISA, Middleware, Mambu, Softprom փորձագետներ։

AWS տարածքային կառավարիչ Վերանիկա Ռամանովսկայան  ներկայացնելով «Նորարարությունն Ամազոնում» զեկույցը՝ նշեց, որ այսօր ապրում ենք տեխնոլոգիական նորարարությունների դարաշրջանում։ Տեխնոլոգիաներն, ըստ նրա, մեր կյանքում գրեթե ամենուր են։

Նրա խոսքով՝ իրենք ամեն ինչ անում են հաճախորդների համար, և միշտ հաշվի են առնում նրանց կարծիքը։

«Որքան էլ բիզնեսը նորմալ է ընթանում, հաճախորդները միշտ ավելին են ուզում։ Ուստի, մենք ամեն ինչ անում ենք նրանց համար, հաճախորդները մեզ համար շատ կարևոր են»,- ասաց AWS տարածքային կառավարիչը։

Վերանիկա Ռամանովսկայան նշեց, որ այն ընկերությունները, որոնք զբաղվում են ինովացիայով, պետք է հետազոտություններ կատարեն շուկայում՝ հասկանալու համար իրենց հաճախորդների կարիքները։

Բիզնեսում, ըստ նրա, կարևոր է նաև արագությունը. «Մենք մեր լիդերներին սովորեցնում ենք, որ իրենց որոշումները կայացնեն 70 տոկոս ինֆորմացիայի հիման վրա»։

Վերանիկա Ռամանովսկայան ասաց, որ արհեստական բանականության միջոցով իրենք ունեն օգնության մեծ համակարգ, որը դրված է հենց Amazon-ում:

«Իհարկե, դա մյուսներին տեսանելի չէ, սակայն դրա միջոցով մենք կարողանում ենք հասկանալ, թե ինչ կարիքներ ու պահանջներ կան շուկայում: Արհեստական բանականության միջոցով է, որ մենք կարողանում ենք այդ հետազոտությունն իրականացնել: Սա մեզ օգնում է, որ Amazon-ը միշտ առաջատար դեր խաղա աշխարհում»,- ընդգծեց նա։

AWS տարածքային կառավարիչը նշեց, որ Ամազոնի առաքելությունն է դառնալ ամենահաճախորդակենտրոն ծառայություններ մատուցողը. «Մենք սկսում ենք հենց դրանից, դա մեր առաջնային կետն է` հասկանալ այն անհանգստությունները, այն մտահոգությունները, որ հաճախորդն ունի: Շատ կետեր կան, որոնց վրա մենք կարող ենք կենտրոնանալ, շատերը կենտրոնանում են տեխնոլոգիաների վրա, շատերը` մրցակցության: Մենք՝ Ամազոնում մեծապես կենտրոնացած ենք հենց հաճախորդների վրա: Երբ սկսում եք հաճախորդներից, ձեր առաջ կբացվեն մի շարք հորիզոններ»։

Նրա խոսքով՝ ցանկացած ընկերություն պետք է ունենա նորարարությունների մշակույթ: Առաջինն, ըստ նրա, հենց հաճախորդակենտրոն լինելն է, այսինքն՝հաջողության հասնելու համար  հեռուն գնացող տեսլական պետք է ունենալ, պետք է համառ լինել:

«Շատ կարևոր մանրուքներին պետք է ուշադրություն դարձնել: Ինովացիոն մշակույթը պետք է ներդրված լինի թիմի յուրաքանչյուր անդամի մտածելակերպի մեջ, պետք է նաև հանդուրժողականություն ունենալ: Փորձարկումներ անելը և ձախողելը նորմալ է, պետք չէ դրանից կաշկանդվել: Նաև պետք է ունենալ պատրաստակամություն, որ ինչ-որ գործընթաց պետք է անել երկարաժամկետ»,- ընդգծեց Վերանիկա Ռամանովսկայան։

Անդրադառնալով նորամուծություններին՝ նշեց, որ երբ ներմուծում են ինչ որ մի արտադրանք, պետք է համբերատար սպասել դրա հաջողությանը, քանի որ դա հասկանալու համար հաճախորդին երկար ժամանակ է պետք: Ուստի, ցանկացած գործում կարևոր է համբերատարությունը։

Նրա խոսքով՝ իրենք մշտապես համեմատություն են անում՝ ինչ ունեին 10 տարի առաջ և ինչ փոփոխություններ են եղել 10 տարի հետո։

«Հավատացեք, որ շատ բաներ չեն փոխվելու 10 տարի հետո: Եվ երբ գտնում եք այն բաները, որոնք անգամ 10 տարի հետո չեն փոխվել, պետք է դրանք հիմնաքար դարձնեք: Օրինակ՝ հաճախորդները երբեք չեն ցանկանա գնել թանկ ապրանքներ, չեն ցանկանա, որ ծառայություններն իրենց դանդաղ մատուցեն: Բացի այդ, որքան շատ է լինում ապրանքների բազմաբանությունը, ընտրությունը, հաճախորդներն այդքան բավարարված են լինում: Երբ դուք ունեք ավելի շատ ապրանքատեսակներ, դա նշանակում է՝ որքան լայն ընտրանի, այնքան` շատ հաճախորդներ: Սա է այն հիմնական կետերից մեկը, որ Ամազոնը մեծապես ընդգծում է»,- ասաց  Վերանիկա Ռամանովսկայան։

Անդրադառնալով արհեստական բանականությանը՝ հավելեց, որ տարբեր հաճախորդների հետ է խոսում՝ հասկանալու համար, թե ինչպես են նրանք արհեստական բանականությունը կիրառում. «Մի բան պարզ է, որ արհեստական բանականության միջոցով աշխատող տեխնոլոգիաները մեծ հեռանկար ունեն»։

Վերանիկա Ռամանովսկայան հայտնեց, որ Ամազոնն ունի Լիդերշիփի (Lidership) 40 սկզբունք, որը սկսվում է հաճախորդներից, ավարտվում արդյունքների հետ կապված սպասելիքների արդարացմամբ։

Նրա խոսքով՝ իրենք գործ ունեն մարդկանց հետ, որոնք տարբեր հմտություններ ունեն, տարբեր սոցիալական խավերից են և նրանց սովորեցնում են այդ 40 սկզբունքները։ Նա միաժամանակ ասաց, որ բիզնեսում հաջողության հասնելու համար կարևոր է այն, որ ճիշտ մարդկանց ընտրեն։

Անդրադառնալով ձախողումներին, AWS տարածքային կառավարիչը նշեց, որ Ամազոնն առաջնորդվում է հետևյալ սկզբունքով, որ ձախողումները նորմալ են։

«Երբ սկսեցինք մեր գործունեությունը, այնպես չէր, որ մեր բոլոր նախաձեռնություններն անմիջապես հաջողություն ունեցան։ Ցանկացած ձախողում սովորեցնում է։ Երբ սկսում եք բիզնես,  դուք ձախողման մեծ ռիսկ ունեք։ Ի վերջո ամեն ձախողումից մենք մի դաս քաղում ենք, և դա դնում ենք մեր հետագա գործողությունների հիմքում։ Amazon-ի ղեկավար Ջեֆ Բեզոսն աում է՝ մենք հիմա ավելի մեծ ձախողումների վրա ենք աշխատում, դրա համար պետք է լինել հանդուրժող»,-նշեց Վերանիկա Ռամանովսկայան։