Բակո Սահակյան. Կրթությունը մեծապես կանխորոշում է երկրի ապագան

Կրթություն, գիտություն 11:20 30/10/2019 Արցախ

Բակո Սահակյան. Կրթությունը մեծապես կանխորոշում է երկրի ապագան

Արցախի Հանրապետության Նախագահ Բակո Սահակյանը հոկտեմբերի 30-ին ուղերձ է հղել «Սահմանելով կրթության նոր տեսլականը» կրթական ֆորումի մասնակիցներին:

Արցախի Հանրապետության նախագահի աշխատակազմի տեղեկատվության գլխավոր վարչության փոխանցմամբ, ուղերձում ասված է.

«Հարգելի՛ բարեկամներ,
Ի սրտե ողջունում եմ ձեզ՝ «Սահմանելով կրթության նոր տեսլականը» կրթական ֆորումի բոլոր մասնակիցներիդ:

Կրթության ոլորտը, իր առջև դրված խնդիրների յուրահատկությունից ելնելով` կապված մատաղ սերնդի կրթության և դաստիարակության հետ, լուծում է ոչ միայն այսօրվա խնդիրները, այլ նաև մեծապես կանխորոշում է երկրի ապագան: Այդ իսկ պատճառով ոլորտն ունի առանձնակի դերակատարություն և նշանակություն մեր ժողովրդի ու պետության համար:

Հայ ժողովուրդը և նրա արցախյան հատվածը միշտ աչքի են ընկել իրենց մտավոր ներուժով: Մեր հայրենակիցները գիտության տարբեր ասպարեզներում հասել են մեծ բարձունքների, ճանաչում են ձեռք բերել ոչ միայն հայրենիքում, այլև նրա սահմաններից դուրս:

Այդ ներուժի բացահայտումը, զարգացումը և կիրառումը պահանջում են համակարգված աշխատանք, սերտ փոխգործակցություն մայր Հայաստանի և Սփյուռքի միջև, տարբեր երկրների գիտա-կրթական հաստատությունների հետ գործնական կապերի հաստատում և խորացում, առաջատար փորձի կիրառում:

Այս տեսանկյունից կարևոր ու պահանջված է գիտական համաժողովների, սեմինարների և քննարկումների կազմակերպումը, ինչը հնարավորություն է տալիս ավելի խորը և համապարփակ ձևով դիտարկել ոլորտում առկա խնդիրները, մշակել դրանց լուծման արդյունավետ տարբերակներ, մշտական կապ պահպանել ինստիտուցիոնալ և անհատական հարթություններում:

Մեկ անգամ ևս ողջունում եմ ձեզ և մաղթում ակտիվ ու արդյունավետ աշխատանք: Հաջողություններ և ամենայն բարիք բոլորիդ»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: