Ձեր վստահելի աղբյուրը

Ազգային ժողովի մշտական հանձնաժողովներում շարունակվում են «ՀՀ 2020 թ. պետական բյուջեի մասին» ՀՀ օրենքի նախագծի քննարկումները։

Ֆինանսների նախարար Ատոմ Ջանջուղազյանը ներկայացրեց իշխանության պետական և դատական մարմինների ծրագրային ֆինանսավորումները:

«2020 թվականի բյուջեով նախագահի աշխատակազմի համար նախատեսված ֆինանսական մեծությունը կազմում է 1մլրդ  576 մլն  դրամ է, որը 430 մլն-ով ավելի է 2019 թվականի ծրագրի համեմատ: ԱԺ աշխատակազմի համար առաջարկվող նախագծում 6 մլրդ  96 մլն դրամ է նախատեսված, որն այս տարվա ծրագրային ցուցանիշի համեմատ 842 մլն դրամով ավելի է։  Վարչապետի աշխատակազի համար ֆինանսական ցուցանիշը կազմում է 20,8 մլրդ դրամ, որը գումարային արտահայտությամբ նախորդ տարվանից տարբերվում է նախորդ տարվանից շուրջ 4 մլրդ դրամով։  Սահմանադրական դատարանի աշխատակազմի համար նախատեսված միջոցները՝ 721 մլն դրամը գրեթե նույն մակարդակին է, ինչ նախորդ տարի, նվազել է շուրջ 4 մլն-ով: Բարձրագույն դատական խորհրդի համար 12,6 մլրդ դրամ է նախատեսվել, որը 193 մլն-ով գերազանցում է 2019 թվականի ցուցանիշը: Դատախազության բյուջեով 5,4 մլրդ դրամ է նախատեսված, որը  86 մլն-ով ավելի է 2019 թվական ծրագրային ցուցանիշից, իսկ Հատուկ քննչական ծառայության բյուջեն 735 մլն դրամ է, և 4,7 մլն դրամ պակաս է այս տարվա ցուցանիշից»,- մանրամասնեց նախարարը:

ԱԺ պետաիրավական մշտական հանձնաժողովի նախագահ Վլադիմիր Վարդանյանը Ջանջուղազյանից հետաքրքրվեց, թե իրավապահ մարմինների աշխատավարձերի հետ կապված փոփոխությունների սպասվու՞մ է, ինչին ի պատասխան նախարարն ասաց. «Աշխատավարձի վերաբերյալ քննարկումը պետք է իրականացվի բոլոր ոլորտների համար: Դատաիրավական բարեփոխումների ռազմավարություն է քննարկվում և դրա մեջ նաև դիտարկվում են բոլոր գործոնները, որոնք հանգեցնելու են արդյունավետության բարձրացմանը և այդ համատեքստում աշխատավարձերի բարձրացմանը ևս: Աշխատանքի վարձատրության չափերը ներկայացված են բյուջեի նախագծում եղած կարգավորումներին համահունչ հաշվարկների հիման վրա են»։