Ձեր վստահելի աղբյուրը

«Հայաստանում և Ղարաբաղում գնում է մի պրոցես, որ աշխատում են ազատվել ինքնուրույն մտածող մարդկանցից, ուզում են ստեղծել հասարակություն, որտեղ  բոլորը ենթակա են մեկ հոգու կամ մեկ կառույցի»,- լրագրողների հետ հանդիպմանը նման կարծիք հայտնեց Հանրային խորհրդի նախագահ Վազգեն Մանուկյանը՝ պատասխանելով հարցին, թե ինչո՞ւ եք վերջին շրջանում հայտնվել ուշադրության կենտրոնում, նույնիսկ պահանջում են ձեր հրաժարականը:

Նա նշեց, որ երևի իր ելույթներն ինչ-որ մարդկանց դուր չի գալիս: Վ. Մանուկյանի խոսքով, կարևոր չէ, թե նախկինում ինչ է եղել, պետք է ոչ թե նախկինի հետ համեմատել, այլ այն  իդեալի, որն ունեն, ինչպիսին պետք է լինի:

«Այդ տեսակետից ես ոնց որ թե չեմ տեղավորովում այդ նկարի մեջ: Այն մարդն եմ, որ միշտ էլ ասում եմ իմ կարծիքը, շատ անգամ  իմ կարծիքը չի համընկել  հասարակության կամ իշխանությունների կարծիք հետ, բայց ես այդ համարձակությունն ունեցել եմ: Ամենյան հավանակությամբ, իշխանություններին միշտ էլ դա  դուր չի գալիս: Նախորդ իշխանությունների ժամանակ էլ դա եղել է, ուղղակի այն ժամանակ շատ բաներ, քանի որ Հանրային խորհրդի և անձամբ իմ հանդիպումները ղեկավարության հետ շատ ավելի հաճախակի էին, հիմա այդպիսի կոնտակտներ չկան, հնարավորություն ունեինք  անմիջապես փակ սենյակում  մեր դժգոհություններն ասել: Հիմա շատ անգամ ուղղակի բարձրաձայնում եմ, բնական է, որ կարող է դուր չգալ»,- ասաց ՀԽ նախագահը:

Ինչ վերաբերում Հանրային խորհրդի՝ որպես կառույց  նպատակահարմարությանը, Վ. Մանուկյանն ասաց, որ 74 երկրում  համապատասխան կառույցներ կան, երկրների մեծ մասում բավականին մեծ օգուտ են բերում պետությանը. «Բայց այստեղ շատ կարևոր է, որ այդ կառույցը և իշխանությունները միասին կարողանան աշխատել, միաժամանակ այդ կառույցը լինի ինքնուրույն  հասարակական կարծիքը կամ իրենց կարծիքը հայտնելու հարցում»:

Խոսելով Սահմանադրական դատարանի, մասնավորապես ՍԴ նախագահ Հրայր Թովմասյանի շուրջ զարգացող իրադարձություններին, նա ասաց. «Գալիս ես իշխանության, քեզ թվում է, որ ամեն ինչը քեզ է պատկանում, դու պետք է բոլոր հարցերը լուծես: Հիշում եմ՝ այդպես իրավիճակ կար նաև 1990 թվականին, երբ եկանք իշխանության: Բայց իրականում  ցանկացած երկրի ղեկավար ունի սահմանափակումներ:  Իշխանության երեք կառույցների  տարանջատումը շատ կարևոր է:  Երբ գալիս ես իշխանության, պետք է իմանաս, որ կա անկախ մամուլ, ձեռք տալ չես կարող, չես կարող ասել, որ ՍԴ-ն պետք է ինձ ենթարկվի, նման բան ասելու իրավունք չունես: Ցանկացած ղեկավար գտնվում է շատ սահմանափակումների մեջ: Դրանցից մեկն անկախ Սահմանադրական դատարանն է»:

Նա հարցադրում արեց՝ արդյո՞ք նախկին  ժամանակաշրջանում ՍԴ-ն անկախ էր, թե ոչ:

«Ֆորմալ  տեսակետից անկախ էր, բայց քանի որ ՍԴ-ն  շատ կապված էր գործադիր իշխանության հետ, այս կամ այն ձևով, չնայած ինքնուրույնության էլեմենտ միշտ ուներ, նաև գտնվում էր գործադիր իշխանության ազդեցության տակ: Հիմա աննախադեպ  իրավիճակ է ստեղծվել: ՍԴ նախագահը մի մարդ է, որը շատ ինքնուրյուն է, ենթարկվում է օրենքներին, Հայաստանում ոչ մեկին տենց ռենտգենի տակ չեն անցկացրել,  ինչպես իրեն: Ոչ մի բան վրան չեն գտել՝ կոռուպցիոներ չէ,  մաքուր մարդ է, իրավաբան է և այլն: Ինքը  հիմա պայքարում է ոչ թե պաշտոնը պահելու, այլ Սահմանադրական դատարանն անկախ պահելու համար:

Գնում են աղջիկներին են հարցաքննում, հորն են հարցնում, թե այդ կտուրը որտեղից, սանիկ են բռնում: Հիմա էլ կպան ինչ-որ թուղթը ճիշտ օրն է ներկայացվել, թե ոչ: Ոչ միայն ծիծաղելի է, նորմալ պետությանը համապատասխան բան չէ: Ոչ թե քաղաքական հետապնդում է իր նկատմամբ, իրեն հետապնդում են, որ ինքը տեղն ազատի, իրենց ուզած մարդուն նշանակեն: Տեղի հարց է»,- ասաց Հանրային խորհրդի նախագահ Վազգեն Մանուկյանը: