Ձեր վստահելի աղբյուրը

«ՌեԱնիմանիա» անիմացիոն ֆիլմերի և պատկերապատման արվեստի 11-րդ միջազգային փառատոնն ավարտվել է, նախօրեին 29-ին «Մոսկվա» կինոթատրոնում անցկացված հատուկ արարողության ընթացքում հայտարարվել են այս տարվա անիմացիոն կինոտոնի հաղթող ֆիլմերի անունները: Փառատոնի մամուլի ծառայությունից հայտնեցին, որ լավագույն լիամետրաժ ֆիլմ է ճանաչվել Անկա Դամիանի «Մարոնայի ֆանտաստիկ պատմությունը»:

Կարճամետրաժ ֆիլմերի անվանակարգում հաղթել է Դինա Վելիկովսկայայի «Կապերը»: Հատուկ հիշատակման է արժանացել Բրունո Քոլեթի «Հիշարժան»-ը և Ռեջինա Պեսոայի «Քեռի Թոմաս, օրերի հաշիվը», առանձնահատուկ հիշատակման՝ Թոմաս Ռենոլդների «Չգիտեմ ինչ»-ը:

Հեռուստատեսային և ուսուցողական ֆիլմեր անվանակարգում հաղթել է Նաթանիել Լիմի և Կլեմանց Մադլեն-Պերդրիլայի «Իմ կյանքը Վերսալում» ֆիլմը: Հատուկ հիշատակման է արժանացել «Բեղմնավորում. Քեթի + Ջեն»-ը (Moth Studio):

Ավարտական ֆիլմեր անվանակարգում լավագույն ֆիլմ է ճանաչվել Դարիա Կաշչերայի «Դուստր»-ը: Հատուկ հիշատակման է արժանացել Սաշա Վասիլևի «Ողջույն, սիրելիներս»-ը: 

Երաժշտական հոլովակների անվանակարգում հաղթել է  Սիմոն Լեհեմբրի «Քայլ առ քայլ»-ը: Հատուկ հիշատակման է արժանացել Վերոնիկա Ստեփանյանի և Լուսինե Պետրոսյանի «Սերունդները երաժշտության մեջ»-ը: 

Լավագույն հայկական անիմացիա՝ Լև Ատամանովի անվան մրցանակ, ստացել է «Քուչա»-ն (Yelling Studio):

Սփյուռքի լավագույն ֆիլմ է ճանաչվել Արսեն Արզումանյանի «Թռչունների բովը»:

Փառատոնի այս տարվա հյուր, ռեժիսոր Հյու Վելչմանին հանձնվել է Վալենտին Պոդպոմոգովի անվան մրցանակը, որը տրվում է լավագույն գեղագիտական լուծում տված կինոյին: Այս մրցանակը «Վան Գոգի կրքերը» կինոնկարը շահել էր դեռևս 2017-ին:

Արարողության ժամանակ Վելչմանը հայ հանդիսատեսին ներկայացրել է իր ապագա ֆիլմի կադրերը, որոնք որևէ այլ երկրում դեռևս չեն տեսել:

Փառատոնի շրջանակներում, ինչպես և նախորդ տարիներին, անցկացվել ենվարպետության դասեր, սեմինարներ:

«ՌեԱնիմանիա» անիմացիոն ֆիլմերի և պատկերապատման արվեստի միջազգային փառատոնը և իր «ՄարԱնի» հարթակը, Գյոթե կենտրոն Երևանի հետ համատեղ, և ՀՀ կրթության, գիտության, մշակույթի և սպորտի նախարարության աջակցությամբ, սեպտեմբերին կազմակերպել էին հատուկ դասընթաց-սեմինար, որի նպատակն էր զարգացնել հայ քննադատների և լրագրողների հմտությունները, ովքեր գրում են հոդվածներ և վերլուծություններ անիմացիոն ֆիլմերի մասին: Այս սեմինարի մասնակիցները հնարավորություն ունեին նախօրոք դիտելու «ՌեԱնիմանիա» 2019- ի անիմացիոն լիամետրաժ և ընտրված լավագույն կարճամետրաժ ֆիլմերը` որպես ուսուցողական օրինակներ շուկայում վերջերս նկարահանված անիմացիոն ֆիլմերի վերաբերյալ հոդվածներ/քննադատություններ գրելու համար: Հյուր փորձագետն էր  Կլաուս Լոսերը: «ՌեԱնիմանիա»-ի փակման արարողության ժամանակ հայտարարվել են լավագույն երկու հոդվածների հեղինակները: Մրցանակը ճանապարհորդություն էր 2 հաղթողների համար դեպի Շտուտգարտ՝ Գերմանիա, 2020թ. մայիսին կայանալիք 27-րդ անիմացիոն կինոփառատոնին: Մրցույթի արդյունքներով հաղթող են ճանաչվել Նանե Պետրոսյանը և Դավիթ Մանուկյանը:
Այս տարի վարպետության դասեր են անցկացրել «Մատանիների տիրակալը» ֆիլմի վիզուալ էֆեկտների պատասխանատու Ռոջեր Կուպելյանը (ԱՄՆ), «Սիրով, Վինսենթ» ֆիլմի ռեժիսոր Հյու Վելչմանը (Լեհաստան), European Animation Awards-ի գործադիր տնօրեն, հայտնի պրոդյուսեր Ժան Պոլ Քոմինը (Ֆրանսիա) և այլք:

Փառատոնի շրջանակում իրականացվել է հատուկ ծրագիր՝ նվիրված նկարիչ, ՀԽՍՀ վաստակավոր նկարիչ, ռեժիսոր Վալենտին Պոդպոմոգովի 95-րդ և հայ կինոռեժիսոր, սցենարիստ, ՀԽՍՀ արվեստի վաստակավոր գործիչ Արման Մանարյանի 90-րդ հոբելյաններին: Ի դեպ, «Ռեանիմանիա» փառատոնի այս տարվա բոլոր տպագիր նյութերում, այդ թվում՝ պաստառին, առկա էր կարմիր կլոր խորհրդանիշ:  Փառատոնն այն զետեղել էր ի հիշատակ Kyoto Animation ընկերության շենքի հրկիզման: Փառատոնի ավարտին ցուցադրվել է Ռեջինա Պեսոայի «Քեռի Թոմաս, օրերի հաշիվը» և Գևորգ Մուրադի «Չորս գործողություն Սիրիայի համար» կինոնկարները: