Ձեր վստահելի աղբյուրը

«Սահմանադրական դատարանի նախագահ Հրայր Թովմասյանի գործը երեկ ենք ստացել, դեռևս ուսումնասիրում ենք, այդ գործով ոչ մի մեկնաբանություն այս պահին չեմ անի»,- այս մասին խորհրդարանում լրագրողների հետ զրույցում ասաց Հատուկ քննչական ծառայության պետ Սասուն Խաչատրյանը։

Ինչ վերաբերում է Թովմասյանին հարցաքննելու իրավունքին՝ նա ասաց. «Հարցաքննելու իրավունք ունենք ցանկացած անձի։ ՀՔԾ-ն քաղաքական վերահսկողություններից դուրս է աշխատում, ղեկավարվում է միայն օրենքով»։

Անդրադառնալով լրագրողների հարցին, թե ինչու՞ են ԱԺ աշխատակազմի ղեկավարի նախկին տեղակալ Արսեն Բաբայանին զրկել հարազատների հետ հաղորդակցությունից, նա պատասխանեց. «Յուրաքանչյուր կոնկրետ դեպքում քննիչն է գնահատում, թե որ խափանման միջոցն է ի զորու ապահովել մեղադրյալի պատշաճ վարքագիծը, տվյալ դեպքում գործը քննող քննիչը եկել է այն եզրահանգման, որ Արսեն Բաբայանի պատշաճ վարքագիծը կարող է ապահովել միայն կալանավորման պայմաններով, հենց այդ նկատառումներով էլ արգելանք է դրվել նրա տեսակցությունների վրա»։

Լրագրողների դիտարկմանը, թե Բաբայանի շփումը արգելվել է նաև անչափահաս երեխաների հետ, Խաչատրյանն ասաց. «Ես նման տեղեկատվություն չունեմ, եթե նման թյուրիմացություն եղել է, իհարկե, կշտկվի»։