Ձեր վստահելի աղբյուրը

«Չեմ կարծում, թե առանց Նիկոլ Փաշինյանի թույլտվության Ազգային ժողովի պատգամավոր Արման Բաբաջանյանը կարող էր մտնել բանտ, խոսել  Նաիրի Հունանյանի հետ, հետո դուրս գար ու նման հայտարարություններ անել»,- լրագրողների հետ հանդիպմանն ասաց Հանրային խորհրդի նախահահ Վազգեն Մանուկյանը՝  պատասխանելով հարցերին, որոնք վերաբերում էին «Հոկտեմբերի 27»-ի գործին, պատգամավոր Բաբաջայանի՝  Ն. Հունանյանի հետ հանդիպմանը, որից հետո  դիմել էր վարչապետին՝ ազատել Վ. Մանուկյանի ՀԽ նախագահի պաշտոնից։

Նա նշեց, որ եթե իշխանությունները «Հոկտեմբերի 27»-ի հետ կապված հարցեր ունեն, կան համապատասխան մարմիններ, թող այդ մարմինները վերանայեն գործը:

«Եթե ինձ ասելու բան ունեն, թող կանչեն, աչքերիս նայելով հետս խոսեն, ոչ թե երկրորդական մարդկանց միջոցով պղտորեն հասարակական …», - ասաց Վազգեն Մանուկյանը։

Նա նշեց, որ Նաիրի Հունանյանի հետ առնչվել է 1988 թ. շարժման ժամանակ, երբ ինքը «Ղարաբաղ» կոմիտեն է ներկայացրել, իսկ Ն. Հունանյանը՝ ուսանողական շարժումը, դրանից հետո շատ երկար ժամանակ անց նա  ցանկացել է ընդունվել ԱԺՄ կուսակցություն,  սակայն չեն ընդունել:

«Բացի սրանցից, ոչ մի առնչություն չեմ ունեցել նրա հետ»,- ասաց Վ. Մանուկյանը:

ՀԽ նախագահը նշեց, որ չի ցանկանում քննարկել «Հոկտեմբերի 27»-ի գործը, «չի ներքաշվի այդպիսի դատարակ բանավեճերի մեջ», «հենց այն  խաղն է,  որի մեջ պարտադրում են մտցնել մեր ժողովրդին»:

««Հոկտեմբերի 27»-ը  հիմա օգտագործվում է, ինչպես Կիրովի գործը Ստալին ժամանակ, որի հետևանքով սկսում են վերացնել և ոչնչացել քաղաքական գործիչներին, իրենց հակառակորդներին:
Բայց ո՞վ է  ուղղորդում:  Այստեղ Բաբաջանյանի հարցը չէ, սա քաղաքական պատվեր է, դրան վերաբերում եմ քաղաքական հարցի, ոչ թե որպես իրավական հարցի: Սա քաղաքական հետապնդման հարց է: Եթե դատարանում նորից լսվի հարցը, կպարզաբանվի, չի լսվի, ուրեմն այդպես կմնա»,- ասաց Վազգեն Մանուկյանը:

Նրա խոսքով, ցավալին այն է, որ «Հոկտեմբերի 27»-ը իսկապես ողբերգություն է, բայց հիմա այդ ողբերգությունը ոնց որ թե ուզում են օգտագործել քաղաքական խնդիրներ լուծելու համար: Վ.Մանուկյանն ասաց, որ երկրում մի շարք խնդիրներ կան, որոնք պետք է լուծել, սակայն այսօր ողջ հասարակությունը զբաղված է «Մարտի 1»-ի, «Հոկտեմբերի 27»-ի գործերով:

«Կարծում եմ՝ այն ջանքերը, որոնք հիմա թափվում են այդ գործերի վրա, այդ ջանքերը եթե օգտագործվեր պետության զարգացման համար, ավելի մեծ արդյունքների կհասնեինք:
Նիկոլ Փաշինյանը շանս ուներ, նորանկախ պետությունում որևէ մեկն այդպիսի մեծ շանս չուներ: Իսկապես ժողովրդի վստահությունն ուներ, ժողովուրդը փողոց էր դուրս՝ հույս ունենալով, որ կկառուցենք նոր երկիր, որտեղ կենսամակարդակը կբարձրանա, ազգային հարցերը կլուծվեն: Դրա փոխարեն անընդհատ դատական պրոցեսների մեջ ենք, խոսում ենք դրանց մասին»,- ասաց ՀԽ նախագահը:

Վ. Մանուկյանի խոսքով, իհարկե, պետք է պարզել, թե ինչ է եղել «Մարտի 1»-ին, սակայն այդպիսի դեպքերը սկսում են պարզել ոչ թե վերևից, այլ ներքևից. «Նախ և առաջ հետաքննում են իմանալու՝ ով է կրակել, ով է հրաման տվել: Այստեղ սկզբում նշանակում են մեղավորը, հետո նոր սկսում են հետաքննությունը: Կողմն եմ, որ ամեն ինչը բացվի, բայց այդպիսի հետաքննության հետ համաձայն չեմ»:

Նա նշեց, որ «Հոկտեմբերի 27»-ն ավարտված գործ է, բայց գուցե կան թերություններ ու պետք է վերանայել:

«Կողմ եմ, թող վերանայեն, բայց ոչ թե հասարակության մեջ իրար դեմ լարվածություն առաջացնելու համար: Դատական գործ է, համապատասխան մարմիները պետք է քննեն»,- ասաց Վազգեն Մանուկյանը: