Սիրիայի պատերազմն ու նավթի պաշարների շուրջ մրցակցությունը
Սիրիայի նավթային պաշարների պաշտպանությունը ԱՄՆ-ի նախագահը համարում է առաջնահերթություն, և չնայած այստեղից ամերիկյան ուժերը դուրս բերելու փաստին, այլ զորքեր է մտցնում՝ նավթի հանքերի անվտանգությունն ապահովելու համար։
Իսլամական պետությունը՝ Դաեշ ծայրահեղական կազմակերպությունը, երբ տարիներ առաջ սկսեց լայնածավալ տարածքներ գրավել Իրաքում ու Սիրիայում, հիմնականում կախյալ էր այդ երկրների նավթային պաշարներից։Այս մասին գրում է Ամերիկայի Ձայնը։
Վերլուծաբան Լորի Բլենքի խոսքերով, ծայրահեղականները նավթն օգտագործում էին ոչ միայն որպես վառելանյութ իրենց ռազմական տեխնիկայի համար, այլ նաև կարողանում էին նավթը հասցնել սև շուկա։
Սակայն, չնայած ԱՄՆ նախագահ Դոնալդ Թրամփի այն խոսքերին, որ հարկավոր է վերահսկել նավթային պաշարներն այնտեղ հօգուտ ԱՄՆ-ի, մեծաթիվ փորձագետներ չեն ընդունում այն կարծիքը, թե ամերիկյան ընկերությունները կարող են օգտվել Սիրիայի նավթային պաշարներից։
Նրանցից Ջեֆ Քոլգանի խոսքերով, ամերիկյան ընկերությունները կարող են կանգնել այնտեղ գործունեություն ծավալելու շուրջ իրավական ու գործնական դժվարությունների առջև։
«Եվ ես չեմ կարծում, որ նրանք հետաքրքրված կլինեն այնտեղ գործունեություն ծավալելու աշխատանքներով»,- ասում է նա ու հիշեցնում, որ ահաբեկիչները, սկսած Օսամա բին Լադենի ժամանակներից, միշտ են փորձել տարածել այն կարիծիքը, որ Ամերիկան խառնվում է Մերձավոր Արևելքի խնդիրներին, այստեղի նավթի պաշարներից շահ ստանալու նպատակով։
«Եվ ահա Թրամփի այն հայտարարությունը, թե ինքը փորձելու է գործարք նախապատրաստել «Էքսոն մոբիլ» կամ այլ ընկերությունների հետ՝ Սիրիայի նավթի պաշարներից օգտվելու համար, կարող է իրոք թյուր տպավորություն ստեղծել, որ այո՛, ԱՄՆ-ի նպատակն այստեղ հենց դա է եղել»,-ասում է փորձագետը։
Պատերազմները միայն նման նպատակներով սկսելու ու շարունակելու մասին տեսակետները հենված են հին ժամանակներից մնացած փորձառության վրա ասում է նա։
«Նման գաղափարներն այլևս հնացած են։ Հին պատերազմների դեպքում էին արշավում, գրավում ու տնօրինում։ Ներկա աշխարհն այսօր չի կարող գործել նման կերպ»,- գտնում է վերլուծաբանը։
Սակայն այն հանգամանքը, որ Սիրիայի հակամարտության մեջ ներքաշված են մի քանի կողմեր՝ Ռուսաստանը, քրդերը, Սիրիան ու նույնիսկ Իրանի զինված ջոկատները, խոսում է այն մասին, որ նավթի պաշարների վրա վերահսկողություն հաստատելու հարցում ևս մրցակցությունն անխուսափելի է։
Հարակից հրապարակումներ`
- Սիրիայի շուրջ Էրդողան-Պուտին պայմանավորվածությունները բարդ կոմպրոմիսի արդյունք են. Ռուբեն Սաֆրաստյան
Լրահոս
Տեսանյութեր
Վ.Հակոբյան. Ռուսաստանի հետախուզությունն ասում է՝ գիտենք, ինչ փողեր են գալիս, ում գրպաններն են մտնում
