Ձեր վստահելի աղբյուրը

«Սփյուռքի ոլորտում 2020 թվականի ծրագրերի իրականացումը բաժանվել է երկու ուղղությունների՝ ՀՀ-Սփյուռք գործակցության իրականացումը և ՀՀ զարգացման գործընթացներում Սփյուռքի ներուժի ներգրավումը»,- «ՀՀ 2020 թվականի պետական բյուջեի մասին» ՀՀ օրենքի նախագծի քննարկման ժամանակ ասաց Սփյուռքի գործերի գլխավոր հանձնակատար Զարեհ Սինանյանը՝ հայտնելով, որ այս երկու ուղղությունների համար կպահանջվի 775 մլն դրամ։

«Առաջին ուղղությունը, որին ակնկալում ենք հատկացնել 450 մլն դրամ, ենթադրում է 6 ծրագիր։ «Քայլ դեպի տուն» ծրագրի համար հաջորդ տարի 140 մլն դրամ կհատկացվի և կհյուրընկալեն 13-22 տարեկան մինչև 800 երիտասարդների։ Երկրորդ ծրագիրը երիտասարդ առաջնորդների վերապատրաստման ծրագիրն է, որի համար կհատկացվի 25 մլն դրամ: Երրորդը՝ ՀՀ հանրային ոլորտում սփյուռքահայ երիտասարդների պրակտիկան է, որը բոլորովին նոր ծրագրիր է և նպատակաուղղված է բարձրագույն կրթությամբ, մասնագիտական բարձր որակավորմամբ սփյուռքահայ մասնագետներին ՀՀ բերելուն: Արդյունքում նախատեսվում է մինչև 20 երիտասարդների ծախսերը հոգալ, և դրա համար հատկացնել 90 մլն դրամ։ Հաջորդը ՀՀ-Սփյուռք գործակցության վերաբերյալ իրազեկման ծրագիրն է։ Սփյուռքի համար պետք  է ընդունելի լինի հայաստանյան մեր օրակարգը և դրա համար բյուջեից կհատկացվի 60 մլն դրամ։  Հաջորդ աջակցությունը Վրաստանի հայալեզու լրատվամիջոցներին է ուղղվում, որը գնահատվում է 10 մլն դրամ: Եվ վերջին ծրագիրը՝ աշխատանքն է Սփյուռքի համայնքներում: 2020 թ. նախատեսվում է մոտ 80 գործուղում և դրա համար նախատեսվում է 125 մլն դրամ»,- մանրամասնեց Սինանյանը։

Ինչ վերաբերում է երկրորդ ուղղությանը՝ նա նշեց, որ հատկացումները դրա համար կազմում է 325 մլն դրամ է. «Առաջին ծրագիրը Սփյուռքի քարտեզագրման ծրագիրն է, բյուջեից դրա համար կհատկացվի 115 մլն դրամ: Սփյուռքի ներուժի վերաբերյալ երկրորդ մասը տվյալների համակարգի ստեղծումն է: Այսինքն՝ տեղեկությունները հավաքում ենք, պետք է հավաքագրվեն ու վիրտուալացվեն, էլեկտրոնային պլատֆորմ կձևավորվի: Այս տարվա բյուջեում դրա համար 35 մլն դրամ է հատկացվում։ Թվով երեք մասնագիտական համաժողովների համար կհատկացվի 175 մլն դրամ»։