Ձեր վստահելի աղբյուրը

«Ազգային ժողովի օրակարգում Ստամբուլյան կոնվենցիան չկա»,- Ազգային ժողովում լրագրողների հետ զրույցում ասաց պետաիրավական մշտական հանձնաժողովի նախագահ Վլադիմիր Վարդանյանը:

Նրա խոսքով, այն պաշտոնապես շրջանառության մեջ չի դրվել, որպեսզի դրվի, պետք է անցնի որոշակի գործընթաց՝ կառավարություն, Սահմանադրական դատարան, Ազգային ժողով: 

Պատգամավորը հիշեցրեց, որ Հայաստանը ԵԽ անդամ է և  որոշակի առումով պետք է ընթանա այն ճանապարհով: Միաժամանակ հավելեց, որ խոսքը չի գնում որևէ գործընթացի մասին:

«Ես զարմանում եմ, թե ինչու կոնվենցիան կարող է այս աստիճան մեծ արձագանք առաջացնել: Հավատացնում եմ ձեզ, շատ ավելի կոնվենցիաներ կան, որոնք վավերացվել են Հայաստանի կողմից, որոնք ավելի մեծ նշանակություն կարող են ունենալ»,- նշեց Վ. Վարդանյանը:

Պետաիրավական մշտական հանձնաժողովի նախագահի խոսքով, ցանկացած միջազգային պայմանագրի վավերացում պետության ինքնիշխանութան դրսևորման կաևորագույն տարրերից մեկն է:

Ինչ վերաբերում է Եվրոպայի խորհրդի մարդու իրավունքների գրասենյակի ներկայացուցիչների հետ հանդիպմանը, նա տեղեկացրեց, որ այսօրվա աշխատանքային հանդիպումը խնդրել էր համապատասխան պատվիրակությունը:

Հանդիպումը որոշվել էր կազմակերպել առանց  լրագրողների մասնակցության: Վ. Վարդանյանն ասաց, որ քննարկել են աշխատանքային հարցեր՝ կապված Հայաստան- Եվրոպայի խորհուրդ  համագործակցությանը, կանանց նկատմամբ  և ընտանեկան բռնության արգելման վերաբերյալ կոնվենցիայի հետ: