Ձեր վստահելի աղբյուրը

ՀՀ Ազգային ժողովի դիմաց ընդդեմ Ստամբուլյան կոնվենցիայի վավերացման հավաքված ակցիայի մասնակիցները  մի քանի րոպեով փակեցին Բաղրամյան պողոտան: Ակցիայի նախաձեռնող «Կամք» հասարակական նախաձեռնության հիմնադիր Վահագն Չախալյանն ասաց, որ եթե իրենց ձայնը, իրենց նախաձեռնած ստորագրահավաքին միացած ավելի քան 50 հազար քաղաքացու ձայնը լսելի չլինի, ստիպված դիմելու են Սահմանադրությամբ և օրենսդրությամբ թույլ տրված բոլոր միջոցներին:

«Հայաստանում ճանապարհներ կփակվնե, թե ոչ, կապված է միայն Ստամբուլյան կոնվենցիան վավերացնել ցանկացող ուժից: Անհրաժեշտության դեպքում, եթե փորձեն հանկարծ վավերացնել, այո, ճանապարհներ ենք փակվելու, սկսվելու են համահայկական ակցիաներ: Ավելի լավ է հինգ օր ճանապարհներ փակել,  որ այս չարաբաստիկ փաստաթուղթը չվավերացվի, փրկենք մեր սերունդներին այս պիղծ փաստաթղթից»,- հայտարարեց նա՝ դիմելով հավաքված ոստիկաններին: 

Ոստիկաններից մեկն ասաց, որ Հայաստանում փակ ճանապարհներ չեն լինելու, իրենք գործելու են օրենքի սահմանում ու համապատասխան:

Ակցիայի մասնակիցներից Երևանի ավագանու նախկին անդամ Մարինա Խաչատրյանը հարցով դիմեց ոստիկանին. «Օրինակ, եթե փակենք, քաշքշելո՞ւ եք մեզ: Այսինքն Փաշինյանին Նիկոլին կարելի՞ էր: Ուզում եմ հասկանալ՝ ինչ տարբերություն իմ ու Նիկոլ Փաշինյանի միջև, ինչու էր իրեն կարելի, իսկ ինձ՝ ոչ»:

Ոստիկանն արձագանքեց. «Որևէ տարբերություն չկա: Օրենքով սահմանված կարգով, եթե այլ քաղաքացիների  իրավունքը սահմանափակվեց, բնականաբար, ոստիկանությունը օրենքով սահմանված կարգով կկիրառի իր լիազորությունները»:

Հիշեցնենք, որ այսօր հայկական արժեքների պաշտպանության «Կամք» հասարակական նախաձեռնությունն Ազգային ժողովի դիմաց բողոքի ակցիա է անում: Ավելի վաղ «Ժողովուրդ» օրաթերթը գրել էր, որ այսօր կոնվենցիան կքննարկվի ԱԺ պետաիրավական հարցերի, արտաքին հարաբերությունների և մարդու իրավունքների պաշտպանության և հանրային հարցերի մշտական հանձնաժողովների համատեղ նիստում, որին մասնակցելու են նաև Եվրոպայի խորհրդի մարդու իրավունքների գրասենյակի ներկայացուցիչները: