Ձեր վստահելի աղբյուրը

Հանրային խորհրդի նախագահ Վազգեն Մանուկյանը համոզված է, որ նորաստեղծ «Ազգային օրակարգ» կուսակցությունը կարևոր դեր կկատարի Հայաստանի քաղաքական դաշտում՝ ճանաչելով կուսակցության հիմնադիրներին, իմանալով նրանց  տեսակետներն ու անցած ուղին: Կուսակցության հիմնադիր համագումարում ունեցած ելույթում նա նշեց, որ կուսակցություններն առաջանում են պայքարների ժամանակ, Հայաստանում կուսակցություններ ստեղծվեցին նաև 1988 թվականին Ղարաբաղյան շարժման ժամանակ:

«Ղարաբաղյան շարժումը շատ խնդիրներ լուծեց, որոնք դրված էին  իր առջև, նաև  շատ շեղումներ ունեցավ: Ինչ-որ տեղից հետո, երբ որ ընտրություններն արդեն չէին դարձել քաղաքականության մեջ փոփոխություններ  մտցնելու մեխանիզմ, կամաց-կամաց այդ կուսակցությունները վերացան կամ թուլացան քաղաքական ասպարեզում»,- ասաց Վ. Մանուկյանը:

ՀԽ նախագահի խոսքով, հիմա մի նոր փուլ է սկսվում, կարծում է՝ առջևում դեռ շարունակվելու է պայքարն իրական, ազգային,  ժողովրդավարական պետություն կառուցելու համար, կառուցելու պետություն, որը ժամանակակից է, արդիական է, միաժամանակ խարսխված է ազզային արժեքների վրա:

«Դատարկ դաշտը լցվելու է նոր ու հզոր կուսակցություններով: Կարծում եմ՝ սա այդ կուսակցություններից մեկն է»,- նշեց Վ. Մանուկյանը:

Նա ասաց, որ  քաղաքականությունն անընդհատ պայքար է, և միայն կազմակերպչական աշխատանքներով չեն կարող մարդիկ գրավել:

«Պայքարը դժվար գործ է, պայքարի ժամանակ առաջանում են հակառակորդներ: Շատ հզոր պետք է լինես, որ թույնով ու ատելությամբ չլցվես  հակառակորդների նկատմամբ: Պայքարի ժամանակ կուսակցությունը դառնում է  մի ընտանիք, եղբայրություն, մեծ բարոյական ուժ է պետք, որ դա չդառնա թայֆա, անկանոն բան:

Եթե հանկարծ մի օր հաջողվի գաք իշխանության, ձեզ մյուս վտանգն է սպառնում. դուք կարծում եք, որ ամենախելքոն եք, ամենակարողն եք, քանի որ դուք մտածում եք պետության, ժողովրդի մասին, երբեմն կարող եք օրենքները խախտելով դա անել ու վերցնեք բանաձևը, որ նպատակն արդարացնում է  միջոցը»,- ասաց Վազգեն Մանուկյանը: