Ձեր վստահելի աղբյուրը

Արցախի Հանրապետության նախագահի մամուլի խոսնակ Դավիթ Բաբայանը ՀՀ վարչապետ Նիկոլ Փաշինյանի  ֆեյսբուքյան երեկվա ուղիղ եթերում ղարաբաղյան հիմնախնդրի վերաբերյալ հնչեցրած հայտարարություններից կարևորում է մասնավորապես՝ «բացառվում են դավադրությունները Ղարաբաղի հարցում»:

«Հայաստանի ղեկավարը մի շատ կարևոր թեզ է առաջ քաշել, նշել է, որ չի կարող Արցախի նկատմամբ  դավադրություն լինել, դա անընդունելի է: Իհարկե, մենք երբևէ չենք կասկածել, որ կարող է Հայաստանի որևէ ղեկավար դավադրություն անի Արցախի նկատմամբ, դա կլինի հայոց պետականությանը վերջը: Լավ է, որ ևս մեկ անգամ վերահաստատվեց, փաստորեն սա ինչ- որ տեղ երդում է եղել վարչապետի կողմից, որ որևէ նման քայլ չի արվելու, ոչ թե եղել է լոկ հայտարարություն»,- Panorama.am-ի հետ զրույցում ասաց նա:

Ինչ վերաբերում է Ն. Փաշինյանի հայտարարությանը, որ «Ղարաբաղի հարցի որևէ լուծում պետք է ընդունելի լինի Հայաստանի, Ղարաբաղի, Ադրբեջանի ժողովուրդների համար», նա նշեց, որ պաշտոնական Ստեփանակերտը նմանատիպ թեզ, մի քիչ այլ շարադրությամբ, շատ վաղուց է առաջ քաշել:

«Մենք միշտ ասել ենք, որ հակամարտության համապարփակ ու վերջնական կարգավորման համար անհարժեշտ է, որպեսզի պատմական հաշտություն կնքվի ժողովուրդների միջև: Այդ պատմական հաշտությունը փաստաթուղթ չենք ստորագրում, ժողովուրդները գալիս են պատմական հաշտության ինչպես ռուս և գերմանացի, գերմանացի և ֆրանսիացի ժողովուրդները: Ավելի լայն ու խորը հասկացություն է: Մինչև դա չլինի, անհնարին է  ակնկալել որևէ առաջընթաց: Իսկ ինչպես տեսնում ենք, Ադրբեջանը պատրաստ չէ նման քայլերի, մոտեցումների: Սա հակամարտության կարգավորման գործընթացում ամենամեծ ու միակ խոչընդոտն է»:

Հարցին, թե ՀՀ վարչապետը խոսել էր նաև հանրաքվեի մասին, բայց ինչպիսի՞ նոր իրավիճակ, հարց պետք է լինի, որ համազգային ֆորմատով կարող է որոշվել, չէ՞ որ Արցախը տարիներ առաջ իր անկախության հանրաքվեն արդեն արել է, Դավիթ Բաբայանը պատասխանեց. «Չգիտեմ՝ կոնկրետ ինչ նկատի ունի վարչապետը: Ասենք մի առաջարկ են անում, փորձեն հանրավքեի դնել: Այն, որ Արցախի ձայնը նույնպես վճռորոշ է լինելու, արդեն իսկ նշանակում է, որ առանց Արցախի, Արցախի մեջքին, հետևին որևէ սեպարատ պայմանավորվածություն չի կարող լինել առհասարակ: Սա խոստովանություն էր, երդում էր Հայաստանի վարչապետի կողմից:

Թող լինեն համազգային քննարկումներ: Իսկ ի՞նչ է՝ համազգային քննարկումը  նշանակում է, որ պետք է Արցախը հանձնվի: Եթե մեր ժողովորրդը գնա այդպիսի աննորմալ որոշման, որ պետք է Արցախը հանձվի, ուրեմն մեր ժոովուրդն արժանի չէ, որպեսզի ունենա անկախ պետականություն և այն անմիջապես կործանվելու է»:

Նրա խոսքով, այդ հանրաքվեն չի նշանակում, որ պետք է կասկածի տակ դնի Արցախի անկախությունը, անվտանգությունը, հուսալի ապագան:

«Մենք միշտ ասել ենք՝ մեզ համար չկա վերադարձ անցյալին: Չի՞ կարող լինել հանրաքվե,  որ մենք  միավորվում ենք և որը պետք է լինի ապագա Հայաստանի դրոշը»,- ասաց Դավիթ Բաբայանը: