Ձեր վստահելի աղբյուրը

«Պրոմտեխնոլոգիա» ընկերությունը (դիպուկահար հրացաններ արտադրող ORSIS ընկերություն) Հայաստանի պաշտպանության նախարարությունից ոչ պաշտոնական առաջարկ է ստացել՝ լուծելու համար այս գերատեսչության համար զենքի խմբաքանակի մատակարարման չեղարկված գործարքի հարցը։ Եղել նաև ընկերության հետ ոչ ֆորմալ կապեր հաստատելու փորձեր, ենթադրաբար, ՀՀ ՊՆ-ին մոտ կանգնած մի քանի անձանց կողմից։ Այս մասին  ТАСС գործակալությանն ասել է ORSIS-ի խոսնակը:

«Մենք ստացել ենք Հայաստանի պաշտպանության նախարարության ոչ պաշտոնական հրավերներ՝ գալ և նստել բանակցությունների սեղանի շուրջ: Եղել են նաև ընկերության հետ ոչ ֆորմալ կապ հաստատելու փորձեր՝ պաշտպանության նախարարությանը մոտ կանգնած որոշ անձանցից: Կարծում ենք, որ տվյալ դեպքում այն կոռեկտ չէ ու անթույլատրելի է, երիկխոսությունը պետք է լինի պաշտոնական»,-ասել է ընկերության ներկայացուցիչը։

Միևնույն ժամանակ, «Պրոմտեխնոլոգիա» ընկերությունը, ինչպես գրում է ТАСС-ը, հույս է հայտնել, որ գործի լուծումը դատարան չի հասնի:

Ընկերությունը հիշեցրել է, որ ի նշան զենքի մեծ խմբաքանակի մատակարարման մրցույթի չեղարկման՝ նամակներ են ուղարկվել ՀՀ պաշտպանության նախարար Դավիթ Տոնոյանին:

Նշենք, որ վերջերս ՀՀ վարչապետ Նիկոլ Փաշինյանը «Kommersant» պարբերականին տված հարցազրույցում «ORSIS»  ընկերության զենքի վաճառքի տենդերի մասնակցության հայտի մերժման վերաբերյալ հարցին ի պատասխան ասել էր, որ սա աննախադեպ բան չէ, մրցույթ է, առաջարկի, պահանջարկի խնդիր է:

«Ոչինչ չկա մեկնաբանելու: Ռազմատեխնիկական համագործակցության ոլորտում Ռուսաստանը Հայաստանի համար թիվ մեկ գործընկերն է: Այնպես որ, այդպես է և այդպես էլ կլինի: Մեկ ընկերության և մեկ գործարքի հետ կապված իրավիճակը, չեմ կարծում, որ այնքան շոշափելի է, որ հիմա պետք է քննարկենք»,-ասել է Փաշինյանը: