Ձեր վստահելի աղբյուրը

Թե Ազգային ժողովի, թե կառավարության կողմից բոլոր ջանքերը ներդրված են, որպեսզի հասնենք բյուջետային գործընթացի համատեքստում արդյունավետության ամենաբարձր աստիճանին։  Այս մասին այսօր ԱԺ ֆինանսավարկային և բյուջետային հարցերի հանձնաժողովի նիստի ժամանակ ասաց ՀՀ ֆիանանսների նախարար Ատոմ Ջանջուղազյանը։

Ներկայացնելով 2020 թվականի ֆինանսական ծրագրերը, նախարարը նշեց՝  առաջինը, որ արժանի է ուշադրության, հարկային քաղաքականության բարեփոխումների մեկնարկն է։ Խոսքն, ըստ նրա,  տնտեսության մրցունակության բարձրացման մասին է։

«Համոզված ենք, որ եկամտահարկի և շահութահարկի փոփոխությունները չեն կարող ուշացնել ակնկալվող  արդյունքները»,- նշեց Ատոմ Ջանջուղազյանը։

Անդրադառնալով պետական պարտքին՝ ֆինանսների նախարարն ասաց, որ 2020 թվականին  ակնկալվում է պետական պարտքի բեռի նվազեցում։ «Մենք պարտքը ներգրավում ենք բացառապես կապիտալ ծախսերի համար»,- ասաց նա։

Ատոմ Ջանջուղազյանի խոսքով՝ Հայաստանի պատմության մեջ առաջին  անգամ այս տարի պետական պարտքը ներգրավվել են բացառապես ծրագրային ձևով, ոչ թե բյուջեի ֆինանսավորման համար։

«Բյուջետային աջակցության վարկերը, որպես կանոն, տրամադրվում են միջազգային ֆինանսական կազմակերպությունների կողմից։ Դրանք տրամադրվում են այն երկրներին, որոնք ունեն համեմատաբար ավելի խորը խնդիրներ տարբեր բնագավառներում։ Հիմնական ցուցանիշը, որ հաշվի են առնում, 1 շնչին բաժին ընկնող ՀՆԱ-ն է։ Որպես կանոն, այդ վարկերը տրամադրվում են արտոնյալ պայմաններով»,- ասաց ֆինանսների նախարարը։

Նախարարը նշեց նաև, որ նախկինում Հայաստանը ցածր եկամուտ ունեցող երկրների դասին էր պատկանում, իսկ հիմա՝ միջին եկամուտ ունեցող երկրների դասին։

«Համոզված եմ, որ դա ժամանակավոր է, քանի որ ինչպես նախկինում հոգնել էինք ցածր եկամուտ ունեցող երկիր լինելուց, համոզված եմ, որ հիմա էլ հոգնել ենք միջին եկամուտ ունեցող երկիր լինելուց։ Մեր նպատակը բարձր եկամուտ ունեցող երկրների շարքում դասակարգվելն է»,-  ընդգծեց Ատոմ Ջանջուղազյանը։