Ձեր վստահելի աղբյուրը

Հանրային խորհրդի անդամ, «Կարին» ավանդական երգի-պարի խմբի հիմնադիր և գեղարվեստական ղեկավար Գագիկ Գինոսյանը չի հիշում դեպք, որ իշխանությունը դիմեր իրենց՝ ինչ-որ հարցի շուրջ խորհուրդ լսելու համար, ու չի լսել, իսկ այժմ էլ մեղադրում է անգործության մեջ: 

«Քանի՞ անգամ են կառավարությունը, Ազգային ժողովը հանդիպել Հանրային խորհրդի հետ, Հանրային խորհրդի տված խորհուրդները տարբեր թեմաներով ու առիթներով, Հանրային խորհրդի արածն ինչ-որ բանի տեղ դրվել, որ կառույցին մեղադրում են անգործության մեջ: Այն մասով, որ մենք անգործ չենք եղել, ձեզ խորհուրդ ենք տվել, հարգարժան իշխանություն, ի՞նչ է արվել, խորհուրդն ընդունվե՞լ է, չեմ ասում իրականացվել է, ընդունվե՞լ է ի գիտություն: Քանի՞ անգամ եք հանդիպել, կարծիք լսել Հանրային խորհրդից, կարծիքը հաշվի առնելով ինչ-որ բան փոխել ձեր քաղաքականության, գործունեության մեջ որպես իշխանություն»,- Panorama.am-ի հետ զրույցում նման հարցադրումներ արեց նա՝ պատասխանելով հարցին, թե  իշխանությունները, մասնավորապես ԱԺ փոխնախագահ Ալեն Սիմոնյանը Հանրային խորհուրդն անիմաստ կառույց է համարում, որը որևիցե պտուղ չի տվել:

Գ. Գինոսյանը չի կարծում, որ ՀԽ-ն ամենակատարյալ ձևով է աշխատել, արել է այն ամենը, ինչ որ պետք է. «Բայց, վստահաբար, մենք նույնկերպ ենք, եթե ոչ ավելի լավ, քան իրենք՝ քննադատողները:

Հեշտ է քննադատել: Ռուսական ասացվածք կա՝ «Я начальник — ты дурак; ты начальник - я дурак», այսինքն՝ մենք իշխանություն ենք, ոչ մեկին չենք ուզում լսել, ոչ մեկի կարծիքը հետաքրքիր չէ, մեզանից խելոք մարդ չկա, վաղը դու կլինես իշխանության, դու կորոշես, որն է խելոք»:

Գ. Գինոսյանի կարծիքով, շատ լուրջ խնդիրներ ունեն վերանայելու,  բայց որևէ մեկը քայլ անելուց առաջ որևէ մեկից կարծիք չի հարցնում, որոշումներն իրար հետևից կայացվում են:

«Լուրջ, ազգային, պետական նշանակություն ունեցող խնդիրները նախ պետք է քննարկվեն, խորհուրդ հարցնեն, հետո նոր վերջնական որոշում կայացվեն»,- ընդգծեց ՀԽ անդամը:

Նրա խոսքով, Հանրային խորդհուրը քննարկում է կազմակերպել տարբեր խնդիրների հետ կապված, Ամուլսարի հարցով հանձնաժողով է ստեղծվել, բայց արդյո՞ք որևէ մեկը՝ շրջակա միջավայրի նախարարը, կառավարությունը, Ազգային ժողովը եկել, հարցրել են՝ նման խնդիր կա, ինչպե՞ս անենք:

«Իրենք գիտեն՝ ոնց անեն: Բա էլ ինչի՞ համար է  այդ խորհուրը: Խորհուրդը խորհուրդ ընդունողի, լսողի համար է»,- ասաց Գ. Գինոսյանը:

Հարցին, թե ինչո՞վ է պայմանավորված վերջին շրջանում Հանրային խորհրդի դեմ ուղղված քննադատատությունները, նրա կարծիքով՝ անձնավորված է:

«Ես Հանրային խորհրդի նախագահ Վազգեն Մանուկյանի կողմնակիցը չեմ, մտերմություն չունեմ, բայց ինչպե՞ս կարելի է  թույլ տալ, որպեսզի մեկը մտնի բանտ, դուրս գա, ինչ-որ մեկին վարկաբեկի, ո՞ր օրենքով և ինչո՞ւ այդ մարդը պատասախան չի տալսի: Կամ՝ եթե այդ մարդը ճիշտ ինֆորմացիա է ասում, ուրեմն քրեական գործ հարուցեք, իսկ եթե չեք հարուցում, նշանակում է այդ ինֆորմացիայի հիմքն անհասկանալի է: Ինչո՞ւ քրեական գործ չի հարուցվում,  ուրեմն ինչ որ հատուկ ծրագրված հետապնդում է: Տրամաբանությունը, որպես նախկին կիբերնետիկ, բերում է սրան, այլ բան չեմ կարողանում հասկանալ»,-ասաց Գագիկ Գինոսյանը: