Ձեր վստահելի աղբյուրը

Ղարաբաղյան հիմնախնդրի կարգավորման բանակցությունները 1994 թվականից հետո գնացել են բավականին ճկուն, 20 տարուց ավելի Հայաստանը վաստակել է կոնստրուկտիվ կողմի իմիջ, Ադրբեջանը՝ ձախողող: Հանրային խորհրդի նիստում «Արցախի հարցում ի՞նչն է ենթակա քննարկման և ի՞նչը՝ ոչ» թեմայով քննարկմանը հայտարարեց Հանրային խորհրդի նախագահ Վազգեն Մանուկյանը:

«2016 թվականին Ադրբեջանը տեսնելով, որ բանակցությունների միջոցով ոչ մի բանի չի կարողանում հասնել, իսկ հարցը  հնանում է, սկսեց պատերազմ՝ Քառօրյա պատերազմը: Դա դիվերսիոն հարձակում չէր, մեծածավալ պատերազմ էր, Ադրբեջանը փորձել էր տեսնել՝ պատերազմի միջոցով կարո՞ղ են լուծել հարցը, թե՞ ոչ: Եթե կարողանային  իրենց առաջին նպատակներին հասնել՝ ողջ ռազմաճակատով սկսվելու էր պատերազմ:  Ցավալի է, ունեցանք կարուստներ, մենք տեսանք որոշ թերություններ մեր բանակում, որոնք պատերազմից հետո արագորեն սկսեցին մաքրել: Բայց Ադրբեջանը տեսավ, որ պատերազմով չի կարող հաղթել: Դա Ղարաբաղի և Հայաստանի հաղթանակն է: Մի երկու բարձունք կորցրեցինք. միշտ էլ ձեռքից ձեռք են անցել այդ բաները, տակտիկական, լոկալ հարցեր են: Ընդհանուր առումով ապացուցեցինք, որ պատերազմով չեն կարող հետ նվաճել այդ հողերը: Դրանից հետո մեր բանակցությունները մտան  մեզ համար ավելի բարենպաստ փուլ»,- ասաց Վ. Մանուկյանը:

ՀԽ նախագահի խոսքով,  հիմա անորոշություն է, չեն իմանում, թե ինչ բանակցություններ են, որն է տեսլականը, ինչ պետք է լինի:

«Այստեղ քննարկելու հարց կա, բայց  ճիշտ կլինի եթե փակ նիստ լիներ վարչապետի հետ միասին: Դա վարչապետի հետ միասին քննարկելու հարց է»,- ասաց Վ. Մանուկյանը:

Այնուհետև նա առաջարկեց առանձին խմբերով քննարկել հարցն ու նոր ընդհանուր  քննարկել ՀԽ նիստում:

ՀԽ անդամ Ստյոպա Սաֆարյանը հիշեցրեց, որ ունեն չկատարված հանձնարարություն կառավարության և  վարչապետի կողմից:

«Կառավարության, վարչապետի հետ մեր առաջին հանդիպման ընթացքում վարչապետը խնդիրն այլկերպ է ձևակերպել: Վարչապետը հետևյալ հարցը դրեց. կառավարությունը որպես մեր պատվիրատու հանրային շահի վերհանման, ցանկացել էր իմանալ,  թե որն է  հասարակության ներսում ստատուս քվոն արցախյան խնդրի ամբողջ էլեմենտների վերաբերյալ»,- նշեց նա:

Ս. Սաֆարյանի այս հայտարարությունը զայրացրեց ՀԽ անդամ Արշակ Սադոյանին:

Վազգեն Մանուկյանն ասաց. «Ես սպեկուլյացիաների մեջ չեմ մտնի, ինձ չեք կարող դրդել այդ դաշտը: Ես ասացի իմ աստածը, լսեցիք, թե ինչ ասաց պարոն Սաֆարյանը, եթե հասկացաք, ինքն ինչ էր ասում: Խնդրում եմ՝ քննարկումների ժամանակ նաև պարոն Սաֆարյանի ասածը նկատի ունենալ: Ես չեմ ուզում  ներքաշվել  քննարկումների մեջ այն էլ նախկին իշպանություն, նոր իշխանություն»:

ՀԽ անդամ Կարինե Դանիելյանն ուղղեց Ս. Սաֆարյանին. «Ստյոպա ջան ստատուս քվո չէ, կոնսենսուս է»: