Ձեր վստահելի աղբյուրը

Ինչպես արդեն տեղեկացրել ենք, կառավարության այսօրվա նիստում ընդունված որոշման համաձայն, ընտանեկան և սոցիալական նպաստների համակարգում ընդգրկված 1000 ընտանիք կդառնա նպաստառուների համար կայուն եկամտի ստեղծմանն ուղղված համակարգ շահառու:

Վարչապետ Նիկոլ Փաշինյանն անդրադառնալով որոշմանը՝ նշեց, որ կառավարությունը այդ 1000 ընտանիքին փողը տալիս է, անասունը տալիս է, կերը տալիս է, խորհրդատվությունը տալիս է և մարդկանց ասում են, որ դրանով հնարավորություն են ստեղծում, որպեսզի նրանք աշխատեն ու իրենց աշխատանքով հաղթահարեն իրենց աղքատությունը:

Այսպիսով, ըստ վարչապետի, սա շատ կարևոր ծրագիր է. «Սա աղքատության հաղթահարման մեր քաղաքականությունն է: Մենք հստակ ուղերձ ենք հղում հանրությանը, որ աղքատությունը հաղթահարելու այլ տարբերակ, քան աշխատանքն է, ուղղակի գոյություն չունի։ Իհարկե ռազմավարական առումով մենք պետք է աղքատության հաղթահարման առաջնային գործիք համարենք կրթությունը, քանի որ կրթությունն է, որ  աշխատանքի շուկայում մարդուն տալիս է մրցունակություն: Սակայն մենք պետք է հստակ արձանագրենք, որ դիպլոմը դեռևս կրթություն չէ»։

Նիկոլ Փաշինյանն ասաց՝  այս հարցի լուծումը պետք է լինի ԿԳՄՍՆ-ի գործունեության առաջնահերթությունը:

«Պարզ է, որ այս հարցի լուծումն առաջացնելու է դիմադրության բազմաթիվ դեպքեր, քանի որ սա հարվածում է բազմաթիվ դիպլոմ ունեցող ու դիպլոմ տվող մարդկանց գործունեությանը։ Ես հույս ունեմ, որ այս ձևակերպումը չի նկատվի այլ համատեքստում»,-հավելեց վարչապետը։

Նա նաև նշեց, որ մարդուն կարելի է հաց տալ մեկ օր, երկու օր, մի շաբաթ, մի տարի, հինգ տարի, տասը տարի, բայց հետո ի՞նչ է լինելու:

«Սկսած նախակրթարանից՝ մենք պետք է մեր քաղաքացուն պատրաստենք, որ սեփական բարեկեցությունը հաստատելու միակ տարբերակը աշխատանքն է, ընդ որում, ուզում եմ հստակ ընդգծել՝ ազնիվ աշխատանքը, որովհետև հանցավոր գործունեությամբ զբաղվող որևէ մեկը Հայաստանում բարեկեցություն վաստակելու շանս պետք է չունենա»,-  ընդգծեց  Նիկոլ Փաշինյանը՝ հավելելով, որ բոլոր նրանք, որոնք բարեկեցություն են վաստակել հանցավոր ճանապարհով, պետք է չկարողանան նման գործունեությամբ զբաղվել: