Ձեր վստահելի աղբյուրը

Դաշնակցության համար չափազանց անհագստացնող է այն քաղաքականությւոնը, որը վարվում է մշակույթի, կրթության ու գիտության բնագավառում։ Լրագրողների հետ հանդիպմանը հայտարարեց  ՀՅԴ Հայաստանի Գերագույն մարմնի անդամ, ազատամարտիկ, հայտնի վիրաբույժ Տարոն Տոնոյանը։

Նա պնդում է՝ առկա է հասարակությանն ապաազգայնացման տանող ընգծված քաղաքականություն։

«Սա մենք որակում ենք որպես ծրագրված քաղաքականություն, որի արդյունքը պետք է լինի ստանալ ՀՀ ապազգային քաղաքացի, որի համար խաղաղությունը ցանկացած տարբերակով ընդունելի է։ Սա է մեզ վախեցնում։ Մենք այս հարցը դիտարկում ենք ազգային անվտանգության տեսանկյունից։ Սա արժեհամակարգ թելադրելու մտածված, ծրագրված քաղաքականություն է՝ որը մասնավորաբար վարվում է ԿԳՄՍ նախարարի, ինչպես նաև կառավարության կողմից»,-ասաց բանախոսը։

Տոնոյանը հիշեցրեց, որ համապետական ու Երևանի քաղաքապետի ընտրություններում 70 տոկոսից բարձր  ցուցանիշներ ստացած քաղաքական ուժը պետք է օգտագործեր այդ ռեսուրսը, առաջ մղեր միասնության գաղափարը, մինչդեռ առաջին բաժանարար գծեր քաշողները հենց իշխանությունները դարձան։

«Եթե որևէ մեկը Դաշնակցությանը քննադատում է  քննադատելու համար, ապա ասեմ՝ մեր քննադատելը միշտ եղել է ի շահ պետության ու մենք երբեք բամբասանքների մակարդակի չենք իջել։ Ինչ վերաբերում է պարոն նախարարի դաստիարակությանը, որ մեր երիտասարդներին ու ՀՅԴ հայաստանյան կառույցին անվանում է անդաստիարակ, պետք է ասեմ, որ մեր դաստիարակությունը հետևյալն է՝  սիրել ընկերոջը, մերձավորին, հայրենիքը ոչ միայն լեզվով, այլև գործով ու սրտով, ինչը արել ենք պատերազմի ժամանակ»,-ասաց ռազմական բժիշկը։

Նա ընդգծեց, այսօր նախարարության դիմաց նստացույց անող երիտասարդները ապրիլյան պատերազմին առաջին արձագանքողներն են եղել ու հայտնվել են Թալիշի առաջնագիծ դիրքերում, և ոչ թե երկրորդ ռուբեժի խրամատներ են փորել։

«Սա է մեր դաստիարակությունը։ Մեզ համար անընդունելի է այն դաստիարակությւոնը, որ Մայր Աթոռի վեհարանը պետք է գրավեն, զավթեն ու այնտեղ վրան խփեն։ Մեզ համար անդաստիարակ են այն մարդիկ, ովքեր դատարաններն են շրջափակում»,-ասաց Տոնոյանը։