Ձեր վստահելի աղբյուրը

Ուղիղ մեկ ամիս առաջ դատարանը վճռել էր, որ Ալ. Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար, դիրիժոր Կոնստանտին Օրբելյանը պետք է վերականգնվի  իր պաշտոնում՝ թատրոնի տնօրեն: Վճիռն օրինական ուժի մեջ էր մտնում հրապարակելուց 30 օր հետո, այսինքն այսօր: Լրագրողների հետ հանդիպմանը Կոնստանտին Օրբելյանն ասաց, որ, թեև այսօր լրացել է ժամկետը, բայց դեռ չի վերականգնվել իր պաշտոնում, այժմ թատրոնի տնօրենի պաշտոնակատարն է Կարինե Կիրակոսյանը:

«Այսօր լրացել է ժամկետը, բայց կարող է ասեն՝ փաստաթղթերը ստացել ենք մի քանի օրից կամ նման բաներ: Տեսնենք»,- նշեց նա:

Հիշեցնենք, որ այս տարվա մայիսին Ալ. Սպենդիարյանի անվան օպերայի և բալետի ազգային ակադեմիական     թատրոնի գեղարվեստական ղեկավար, դիրիժոր Կոնստանտին Օրբելյանը քաղաքացիական հայց էր ներկայացրել ՀՀ մշակույթի նախարարության (այժմ արդեն՝ կրթության, գիտության, մշակույթի և սպորտի նախարարություն) և Ա. Սպենդիարյանի անվան օպերայի և բալետի ազգային ակադեմիական թատրոն ՊՈԱԿ-ի դեմ։  Նրա պահանջն էր՝ անվավեր ճանաչել  մշակույթի նախարարի ժամանակավոր պաշտոնակատար Նազենի Ղարիբյանի  մարտի 28-ի հրամանը,  վերականգնել  աշխատանքի  և վճարել պարապուրդի  գումարը։ Դատարանը բավարարել էր Օրբելյանի պահանջները:

Նա  նշեց, որ չգիտեր՝ ինչ սպասեր դատարանից:

«Երբ Նազենի Ղարիբյանն ինձ հանեց աշխատանքից, որպես պատճառ նշում էր, թե իբրև ես օրենքի խախտմամբ եմ նշանակվել թատրոնի տնօրեն: Բայց ո՞ւմ էր հետաքրքրում, որպեսզի ինձ օրենքի խախտմամբ նշանակեր թատրոնի տնօրեն: Ցանկացած դեպքում, եթե նույնիսկ կառավարությունը, ենթադրենք, սխալ է եղել, ես  ի՞նչ կապ ունեմ: Սակայն դատարանն ապացուցեց, որ օրինական է եղել իմ նշանակումը»,- նշեց Կ. Օրբելյանը:

Նրա խոսքով, երբ իրեն ազատել են աշխատանքից, թատրոնից հովանավորները հեռացել են, քանի որ՝ «ասում էին՝ ձեզ ենք ճանաչում, ձեզ ենք վստահում»:

«Հովանավոր բերելը դժվար է, գնալը հեշտ է, կրկին բերելն՝ ավելի դժվար»,- ասաց նա:

Կ. Օրբելյանը հույս ունի, որ կրկին հովանավորները կվերադառնան թատրոն:

Նա ընդգծեց, որ ընդհանրապես մշակութային օջախներն իրենց թիկունքում պետք է զգան պետության օգնությունը:

«Մեր թատրոնի տանիքից կաթում է, ամռանը շոգ է, բալետի պարողները շոգից ուշաթափվում են: Նորմալ օդափոխություն է պետք:   Կան բաներ, որոնք պետք է արվեն թատրոնի համար ու որոնք այնքան կարևոր է, ինչքան օդը: Ամբողջ հայերի միակ օպերային թատրոնն է: Մի՞թե այդքան դժվար է  միջոցներ գտնել, որպեսզի այս թատրոնի  խնդիրերը լուծվեն»,- ասաց Կ. Օրբելյանը:

Նրա նշեց, որ իր ուժերի չափով ամեն ինչ արել է թատրոնի համար, համերգներ է կազմակերպել, հրավիրել է մասնագետներ, արել է ամեն ինչ, որպեսզի թատրոնի դերասաններն իրենց պահանջված զգան, ցանկանան մնալ այստեղ, ոչ թե մտածեն ուր գնան մի երկու կոպեկ աշխատելու համար:

«Մեր արտիստները բարձր մակարդակի վրա են, նրանց ճանաչում են դրսում ու պահանջված են»,- ասաց օպերայի և բալետի թատրոնի գեղարվեստական ղեկավարը:

Կ. Օրբելյանը կարևորում է, որ հայկական ներկայացումներն արվեն ամենաբարձր մակարդակով, քանի որ հայկական ներկայացումներ կարող են տեսնել միայն այստեղ, մինչդեռ «Կարմեն» և «Տոսկա» կարող են դիտել աշխարհի ցանկացած երկրի թատրոնում:

«Մշակույթին պետք է աջակցել»,- ընդգծեց Կոնստանտին Օրբելյանը: