Ձեր վստահելի աղբյուրը

Թեև Հայաստանի իշխանությունները խստացնում են ծխելու դեմ պայքարը, ծխախոտի արտադրության ծավալներն ու դերը Հայաստանի արդյունաբերության ոլորտում աճում են։

Վիճակագրական կոմիտեի հրապարակած տվյալների համաձայն՝ 2019  թվականի հունվար-սեպտեմբերին Հայաստանում ծխախոտի արտադրությունը, 2018թ-ի նույն ժամանակահատվածի համեմատ աճել է 13.4%-ով:

Ինչպես Panorama.am-ը տեղեկանում է  կոմիտեից, եթե 2018 թվականի հունվար-սեպտեմբերին հանրապետությունում արտադրվել է 20 մլն 663.0 հազար հատ սիգարետ, ապա 2019 թ-ի նույն ժամանակահատվածում՝ 23 մլն 424.7 հազար հատ։

Արձանագրված աճի արդյունքում Հայաստանում ծխախոտի արտադրության մասնաբաժինը մշակող արդյունաբերությունում կազմել է 24.4%:

Հիշեցնենք, որ Հայաստանում 16 և բարձր տարիքային խմբերում ծխախոտի օգտագործման տարածվածությունը տղամարդկանց  շրջանում կազմում է 50%-ից ավելի, կանանց շրջանում՝ 3-4%:  Վիճակագրական տվյալների համաձայն՝ Հայաստանում 16 տարեկանից բարձր տղամարդկանց կեսից ավելին ծխող է, ինչը բարձր ցուցանիշ է։