Ձեր վստահելի աղբյուրը

15:47
Ուսանողների և ՀՅԴ երիտասարդական թևի ներկայացուցիչների՝ ԵՊՀ հայ բանասիրության ֆակուլտետի մոտից մեկնարկած իրազեկման քայլերթն ավարտվել է, նրանք հասել են ԿԳՄՍ  նախարարության շենքի մոտ, միացել այնտեղ նստացույց անող իրենց ընկերներին:

«Նստացույցը խաղաղ անհնազանդության ձևերից մեկն է՝ ամրագրված Սահմանադրությամբ, օրենքներով, որից մենք օգտվում ենք: Որևէ  օրենք չխախտելով՝ իրացնում ենք մեր սահմանադրական իրավունքը, այն է՝ մեր տեսակետն արտահայտելը»,- ասաց ՀՅԴ երիտասարդական միության կենտրոնական վարչության անդամ Քրիստինե Վարդանյանը:

Նա նշեց, որ նստացույցը շարունակվելու է. «Նստացույցը մեր գործիքներից մեկն է, որն այս պահի դրությամբ իրեն արդարացնում է»:

Ք. Վարդանյանը հավատացած է, որ ժողովրդի պահանջով  Հայաստանում հնարավոր է պաշտոնյայի հրաժարական:   

12։20
ԵՊՀ Ֆրանսիական բանասիրության ամբիոն վարիչ Զավեն Հարությունյանը խնդրեց ակցիա իրականացնող ուսանողներին չխանգարել դասապրոցը, նրանց ձայները խանգարում են:

«Հարգում եմ ուսանողներին, բացարձակապես դեմ չեմ առկա հարցերի քննարկումներին, բայց պետք է երկխոսության գնալ: Երբ քննարկենք, լինի երկխոսություն ու տեսնենք, որ մեր պահանջները չեն իրականացվում, ես էլ կմիանամ այդ շարժմանը: Դեռ ժամանակը չէ ծայրահեղ այդ ձևի: Երկխոսության կարիք կա»,- ասաց դասախոսը:

11։28
ԵՊՀ հայ բանասիրության ֆակուլտետի մոտից մեկնարկում է ուսանողների և ՀՅԴ երիտասարդական միության  իրազեկման երթը: Նրանք անցնելու են երևանյան բուհերի մոտով՝  կոչ անելով միանալ իրենց: Այնուհետև նրանք միանալու են կրթության, գիտության, մշակույթի և սպորտի նախարարության մոտ նստացույց անող երիտասարդներին:
Երիտասարդներն ընդգծում են, որ իրենց պայքարը չիջեցնեն քաղաքական, կուսակցական մակարդակի, իրենց պայքարն ապակուսակցական, երիտասարդական, ուսանողական պայքարը է:

«Մեր պայքարը հայոց լեզվի ու գրականության, հայոց պատմության համար է, հայոց եկեղեցու համար է: Սա համազգային, համապետական պայքար է, միտված է ազգային արժեքների պաշտպանությանը»,- հայտարարում են երիտասարդները:

Նրանք կոչ են անում նաև դասախոսներին միանալ իրենց:

«Դիմում ենք ԵՊՀ դասախոսական կազմին. մենք դուրս ենք եկել փողոց պաշտպանելու այն արժեքները, որոնք դուք մեզ փոխանցել եք ու փոխանցում եք՝ մեր լեզուն, կրոնը ու պատմությունը: Մեզ այս պայքարի մեջ մենակ մի թողեք: Սա միայն մեր պայքարը չէ, դուք եք դրանք մեզ փոխանցել, եկեք տեր կանգնեք ձեր փոխանցածին: Կոչ ենք անում դասախոսներին միանալ մեզ: Լավ գիտակցեք, մենք միևնույնն է՝ հաղթելու ենք: Կուզենանք հաղթել ձեզ հետ, նահանջի տեղ չունենք, բայց կուզենանք չնահանջել ձեզ հետ, քանի որ ձեզ հետ մենք մեզ ավելի ամուր ենք զգացել: Միացել ձեր ուսանողին, երիտասարդին»,- ուսանողները դիմում են իրենց դասախոսներին:

Ակցիայի մասնակիցներից Գևորգ Գյուլումյանն ասաց, դասախոսները  պետք է լինեն իրենց ուսանողների կողքին, ցույց տան, որ իրենց դաստիարակած ուսանողների բռնած ճանապարհը ճիշտ է, քանի որ շարժվում են իրենց ցույց տված ճանապարհով:

«Մեզ կրթության նախարարն անդաստիարակներ է անվանում: Մենք ձեր դաստիարակությունն ենք ստացել, փաստորեն ձեր դաստիարակությունն այս նախարարի համար ոչ մի արժեք չունի, դա անդաստիարակություն է: Սա նաև ձեր թասիբի հարցն է»,- նշեց ուսանողներից մեկը:

Գ. Գյուլումյանի խոսքով, ասում են, թե կրթության, գիտության, մշակույթի և սպորտի նախարար Արայիկ Հարությունյանն առաջարկում է երկխոսության գալ:

«Արայիկ Հարությունյանը խնդիրը սեղանի շուրջ լուծելու բոլոր տարբերակները մտցրել է փակուղի: Օրակարգը մեկն է՝ Արայիկ Հարությունյանը պետք է հեռանա, քանի որ ի վիճակի չէ աշխատելու»,- նշեց նա:

Հիշեցնենք,  ուսանողներՀՅԴ երիտասարդների պահանջն է կրթության, գիտության, մշակույթի և սպորտի նախարար Արայիկ Հարությունյանի հրաժարականը, նաև դեմ են կրթության, գիտության, մշակույթի և սպորտի նախարարության կողմից  մշակված «Բարձրագույն կրթության և գիտության մասին» նոր նախագծին, որի համաձայն, բուհերում «Հայոց լեզու և հայ գրականություն» և «Հայոց պատմություն» առարկաների դասավանդումը պարտադիր չի լինելու, պահանջում են կրթության, մշակույթի ոլորտում ազգային քաղաքականություն վարել:
ԵՊՀ հայ բանասիրության և այլ ֆակուլտետների ուսանողներ դասադուլ են անում, ՀՅԴ երիտասարդական թևի ներկայացուցիչներն արդեն մի քանի օր նստացույց են անում ԿԳՄՍ նախարարության մետ:

Նրանք նշում են, որ իրենք վճռական են, չեն նահանջելու՝ մինչև չհասնեն իրենց պահանջների լուծմանը: