Ձեր վստահելի աղբյուրը

Ազգային ժողովն աշխատանքները սկսեց նախօրեին քննարկած նախագծերը քվեարկության դնելով։ Երկրորդ ընթերցմամբ և ամբողջությամբ  92 կողմ, 1 դեմ ձայների հարաբերակցությամբ ընդունվեց  ընդերքի մասին օրենսգրքում և Պետական տուրքի մասին օրենքում լրացում և փոփոխություններ կատարելու մասին նախագծերի փաթեթը։

«Լուսավոր Հայաստան» խմբակցության կողմից ներկայացված Հանրային ծառայության մասին օրենքում փոփոխություն կատարելու մասին օրենքի նախագիծն ընդունվեց առաջին ընթերցմամբ՝ միաձայն։

Կառավարության կողմից ներկայացված Քաղաքացիական օրենսգրքում փոփոխություններ կատարելու մասին օրենքի նախագիծը ևս ընդունվեց երկրորդ ընթերցմամբ և ամբողջությամբ։

Քվեարկության ներկայացվեց «Իմ քայլը» խմբակցության պատգամավոր Աննա Կարապետյանի ներկայացրած «Ազգային ժողովի կանոնակարգ» սահմանադրական օրենքում լրացում կատարելու մասին և «Անվտանգության խորհրդի կազմավորման և գործունեության մասին» օրենքում փոփոխություններ  և լրացում կատարելու մասին հարցը։

ԱԺ նախագահ Արարատ Միրզոյանը տեղեկացրեց, որ քվեարկության ներկայացված փաթեթի առաջին հարցը սահմանադրական օրենք է, ուստի նախագծերի փաթեթը պետք է ընդունվի պատգամավորների ընդհանուր թվի ձայների առնվազն 3/5-րդով։

Վարման կարգով ԼՀԿ պատգամավոր Տարոն Սիմոնյանը նշեց՝  իրենք առաջարկով էին հանդես եկել, որ ԱԺ խմբակցությունների ղեկավարները ևս մասնակցեն ԱԽ նիստերին, սակայն իրենց առաջարկությունները մերժվել էին։

«Մենք փաթեթին դեմ կքվեարկենք»,- ասաց պատգամավորը։

Այսպիսով, նախագծերի փաթեթը չհավաքեց բավարար ձայների քանակ և չընդունվեց։ Կողմ քվեարկեց 66, դեմ 14, ձեռնպահ 20 պատգամավոր։

Երկրորդ ընթերցմամբ և ամբողջությամբ ընդունվեց ՀՀ Ջրային օրենսգրքում լրացումներ կատարելու մասին և վարչական իրավախախտումների վերաբերյալ ՀՀ օրենսգրքում լրացում կատարելու մասին օրենքների նախագծերի փաթեթը։

ԲՀԿ պատգամավոր Միքայել Մելքումյանի ներկայացրած «Ջրօգտագործողների ընկերությունների և  ջրօգտագործողների ընկերությունների միությունների մասին» օրենքում լրացումներ կատարելու մասին օրենքի նախագիծն ընդունվեց ամբողջությամբ։