Ձեր վստահելի աղբյուրը

Նախազգուշական գործադուլ հայտարարած ԵՊՀ Հայ բանասիրության և Հայոց պատմության ֆակուլտետների դասախոսները կողմնակից են կառուցողական քննարկման:

«Մենք հույս ենք հայտնում, ընդամենը խնդրում ենք հանդիպում և հարցի քննարկում մասնագիտական հարթության վրա: Կարծում ենք, որ պետք է փոխադարձ համաձայնության գանք: Մեզ ձեռք չի տալիս այս դասադուլն ու գործադուլը»,- լրագրողների հետ զրույցում ասաց ԵՊՀ Ժամանակակից հայոց լեզվի ամբիոնի դասախոս, գիտությունների թեկնածու, դոցենտ  Ռիտա Սաղաթելյանը, որը նույնպես միացել է գործադուլ հայտարարած դասախոսներին:

Նա նշեց, որ ինչպես ուսանողներին դասադուլի, այնպես էլ դասախոսներին գործադուլի հրահրել է կրթության, գիտության, մշակույթի և սպորտի նախարարության կողմից ներկայացված  «Բարձրագույն կրթության և գիտության մասին» նոր նախագծի աշխատանքային տարբերակը, նախագծի վիճահարույց դրույթները: 

«ԵՊՀ-ում ընդհանրապես չի քննարկվում նախարարի հրաժարականի հարցը, մեր բողոքը վերաբերում է  Հայոց լեզու և Հայոց պատմություն առարկաները ոչ պարտադիր դարձնելու դրույթին:  Մեկ ամիս է բուռն քննարկվում է այս դրույթը: Նախարար Արայիկ Հարությունյանն այս թեզը հիմնավորում է, որ արվում է, այսպես ասած, մեր ուսանողներին մեխանիկորեն կրթությունից ազատելու համար: Բոլոր հայտարարություններն արվում են ակնհայտ  հեգնանքով: Մենք ճանապարհ անցած գիտնականներ ենք, համալսարանում չենք զբաղվում հայոց լեզվի կանոնների սերտումով: Մենք բուհում լրիվ այլ առաքելություն ունենք: Մենք համալսարանում վաղուց արդեն նոր ծրագրերով, մեթոդներով, ժամանակակից պահանջներին համապատասխան հայոց լեզու ենք դասավանդում, շեշտը դնում ենք մեր ուսանողների խոսքի վարպետության վրա, ուսումնասիրում ենք այնպիսի հարցեր, ինչպիսին է խոսքի էթիկա, խոսքի տրամաբանականություն, հռետորության արվեստ, բանավեճի արվեստ: Արդեն չորս տարի ուսանողի սեղանին դրված է նոր դասագիրք՝ «Հայոց լեզու և խոսքի մշակույթ»,- ասաց Ռ. Սաղաթելյանը:

ԵՊՀ դոցենտն ընդգծեց, որ հայոց լեզուն ինչքան էլ կրկնեն, միևնույնն է՝ համալսարանում անելիք ունեն: Իր ասածն ապացուցելու համար նա նշեց, որ գիտության,  արվեստի, կառավարության  ոլորտում բոլոր մասնագետներն այսօր խոսքի առումով խնդիրներ ունեն՝ բառերի անհարկի գործածություն, մտքի տրամաբանական սխալներ, խախտումներ, շարադասական խախտումներ:

«Հայոց լեզուն հայ ժողովրդի ինքնության գրավական է, եթե անգամ համալսարանում ձևական լինի հայոց լեզվի ուսուցումը, պետք է լինի: Հեռու հայոց լեզվից, ձեռքներդ հեռու հայոց լեզվից ու հայ գիտնականից: Հայագետները, գիտնակաները շատ լավ գիտեն իրենց անելիքները: Մեր երկրում ավելի խոցելի խնդիրներ կան, ավելի լավ կլինի այս  փուլում ավելի լուրջ խնդիրներով զբաղվեք, հայագիտությունը վստահելի ու ապահով ձեռքերում է»,- ասաց ԵՊՀ դասախոսը:

Նա նշեց, որ նախարարն իր հայտարարություններում կամ թե ակամա նսեմացրեց հայ գիտնականի դերը՝ պիտակելով որպես կաշառակեր, հայոց լեզուն բուհերից հանելը հիմնավորելով  նաև այս փաստարկով, որ այդպես կանխում են կոռուպցիոն ռիսկերը, նաև՝ կուրծք են ծեծում հիմնականում իրենց ժամերը կորցնող դասախոսները:

«Այո, չէ որ գիտնականն է զրկվում աշխատանքից: Բայց հիմա ասում եմ՝ կրճատեք մեր ժամերը, հարգելի նախարար, որովհետև ես գիտնական եմ, գիտությամբ եմ զբաղվում, 800 ժամից ավելի պարապում եմ ու դրա դիմաց ստանում կոպեկներ: Ուրեմն կրճատեք իմ ժամերը, տվեք կես դրույք, բայց իմ ժամերը կրճատեք ոչ հայերենի կրճատման հաշվին: Տվեք կես դրույք, իսկ բացեք գիտական ֆոնդեր, թող պետությունը հովանավորի, և ես զբաղվում լեզվաբանության զարգացմամբ: Խոստանում ենք՝ երկու տարում սեղանին դնել 10 դասագիրք բոլովին նոր մեթոդներով՝ ըստ առանձին ֆակուլտետների: Այսինքն ինձ վճարեք, ես զարգացնեմ գիտություն: Ես լեզվական օրենքներ սերտել տվող չեմ, ես գիտնական եմ, ինձ ապահովեք արժանավայել աշխատավարձով»,- ասաց Ռ. Սաղաթելյանը:

Նա նշեց, որ նախագիծը կազմելիս որևէ դասախոսի, մասնագետի հետ չեն խորհրդակցել, իրենց կարծիքը հաշվի չեն առել:

«Պարոն վարչապետ, լուսանցքում են մնացել երկրի գիտնականները, գիտությունն առաջ տանող ուժը, ազգի սերուցքը: Ինչո՞ւ: Ինչո՞ւ պետք է Հայաստանում գիտնականը մնա լուսանքում: Որևէ մեկը կարո՞ղ է պատասխանել այդ հարցին: Գործադուլի նպատակը  նաև սա է՝ երկրի ղեկավարությանը ցույց տանք, որ լուսանցքում են մնացել ազգիդ գիտնականները: Իմ անունից պահանջում եմ՝ բարձրացրեք մեր աշխատավարձը միլիոն ու կես: Օրը ցերեկով, բացահայտ եմ պահանջում: Լավ, մենք համեստ ենք, սովորել ենք համեստ կյանքով ապրել: Վճարեք մեկ միլիոն, այն կես միլիոնը տվեք խեղճ ու կրակ դասատուներին: Մեզ՝ գիտնականներիս, մի սարքեք հանրության բերանին ծամոն, որ մենք անբան ենք, լափում ենք պետության բյուջեն, ոչինչ չենք անում, կաշառակեր ենք: Մի պիտակավորենք, այլ գուրգուրեք ու փաղաքշեք, նկատեք օր ու գիշեր աշխատող,  տանջվող, ուսանողի  և համալսարանի համար հոգի ու կյանք, առողջություն տվող գիտնականին»,- ասաց ԵՊՀ դոցենտ Ռիտա Սաղաթելյանը: