Ձեր վստահելի աղբյուրը

Թուրքիայի նախագահ Ռեջեփ Թայիփ Էրդողանը նախօրեին՝ նոյեմբերի 13-ին, ԱՄՆ կատարած այցի ժամանակ հայտարարել է, որ հավատում է, որ ԱՄՆ Սենատը բանաձև չի ընդունի, այսպես կոչված «Հայոց ցեղասպանությունը» ճանաչելու վերաբերյալ: Այս մասին գրում է թուրքական Anadolu գործակալությունը։

«Ես հավատում եմ, որ Սենատը գործելու է խելամիտ և չի կրկնի այն սխալը, որը թույլ է տվել Ներկայացուցիչների պալատը», - ասել է Էրդողանը Մերիլենդի նահանգի Դիայնետ կենտրոնի իր ուղերձում:

Էրդողանը կրկին հնչեցրել է իր կոչը, որ պատմաբանները պետք է  ուսումնասիրեն այդ հարցը:

«Եթե ամերիկյան կողմը իսկապես ցանկանում է արդար գործել, ապա պետք է ձեռնպահ մնա քաղաքական դիրքորոշում որդեգրել այն հարցի շուրջ, որը պետք է որոշեն պատմաբանները»,-ասել է Էրդողանը։

Էրդողանը ասել է, թե «մեկ կողմին լսելն ու սխալ որոշումներ կայացնելը կարող է հանգեցնել անուղղելի արդյունքների Թուրքիա-ԱՄՆ հարաբերություններում»։

«ԱՄՆ Սենատը չպետք է հանձնվի հայկական ահաբեկչական կազմակերպությունների նախաձեռնած սև քարոզչությանը, որը նահատակել է մեր շատ քաղաքացիների, նրանց մեծ մասը դիվանագետներ ու նրանց ընտանիքի անդամներին 1970-ականներին և 1980-ականներին», - հայտարարել է Էրդողանը։

Նշենք, որ նախօրեին ավելի ուշ հայտնի դարձավ, որ հանրապետական սենատոր Լինդսի Գրահամը «վետո» է դրել Սենատում Հայոց ցեղասպանության բանաձևի ընդունմանը՝ Էրդողանի հետ հանդիպումից հետո, որը նախաձեռնել էր դեմոկրատ սենատոր Ռոբերտ Մենենդեսը։