Ձեր վստահելի աղբյուրը

ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանն այսօր ընդունել է Եվրոպական ներդրումային բանկի պատվիրակությանը՝ ԵՆԲ գործարքների, կառավարման և վերակառուցման տնօրինության բաժնի ղեկավար Կատրին Բարբերիսի գլխավորությամբ:Այս մասին տեղեկացնում է ՀՀ ՏԿԵՆ տեղեկատվության և հասարակայնության հետ կապերի վարչությունը: 

Ողջունելով պատվիրակության անդամներին՝ Վաչե Տերտերյանը կարևորել է բանկի ներկայացուցիչների այցը նախարարություն, որն այժմ մի շարք նոր ենթակառուցվածքներ է համակարգում, և  այս հանդիպումը լավ հնարավորություն է համարել  գաղափարների փոխանակման և համագործակցության նոր ուղիներ գտնելու  համար:

ԵՆԲ  ներկայացուցիչ Կատրին Բարբերիսը  շնորհակալություն է հայտնել ընդունելության համար  և  նշել, որ պատվիրակության  այցը Հայաստան նպատակ ունի մոբիլիզացնել իր թիմին  Հայաստանում իրականացվող ծրագրերի ուղղությամբ, ինչը բանկի կողմից ազդակ է համարել՝  արդեն ստորագրված  հանձառություններն իրականացնելու և երկրի հետ ծրագրերի փաթեթն ընդլայնելու ուղղությամբ:

Հանդիպմանը ՏԿԵ նախարարի տեղակալը  բարձր է գնահատել բանկի հետ երկարամյա  և իր ձևաչափով բազմակողմ համագործակցությունը և կարևորել է    ջրամատակարարման, ջրահեռացման ենթակառուցվածքների, էներգետիկ ոլորտներում իրականացվող  ծրագրերի նշանակությունը: Մասնավորապես, անդրադարձ է կատարվել Երևանի ջրամատակարարման բարելավման, Համայնքային ենթակառուցվածքի զարգացման, Հայաստան-Վրաստան 400 կՎ բարձրավոլտ գծի կառուցման ծրագրերին:

Վ.Տերտերյանն առանձնահատուկ կարևորել է համայնքների ենթակառուցվածքների զարգացմանն ուղղված ծրագիրը, ինչը հնարավորություն կտա  բարելավել վեց  մարզի քաղաքային և  գյուղական համայնքների ջրամատակարարման և ջրահեռացման համակարգերը,  կառուցել կոյուղու  մաքրման կայաններ:

Հանդիպմանը կողմերը մանրամասն քննարկել են բանկի ֆինանսավորմամբ իրականացվող ծրագրերը, անդրադարձ է կատարվել մի շարք ընթացակարգային հարցերի: