Ձեր վստահելի աղբյուրը

ԱԺ աշխատակազմի ղեկավարի նախկին տեղակալ Արսեն Բաբայանը, ով երկու օր առաջ ազատ արձակվեց կալանքից, լրագրողների հետ այսօր հանդիպմանն անդրադարձավ իր նկատմամբ իրականացվող քաղաքական հետապնդումը մերժողների հիմնավորումներին։

«Նրանք ասում են, որ Արսեն Բաբայանը քաղաքական գործիչ չէ, այդ պատճառով նրա նկատմամբ չի կարող իրականացվել քաղաքական հետապնդում։ Վստահեցնում եմ, որ նման հիմնավորումը չի ենթարկվում որևէ քննադատության, քանի որ քաղաքական հետապնդման ենթարկվելու համար որևէ դեպքում պարտադիր չէ լինել քաղաքական գործիչ։ Բայց շատ կարևոր է,  թե իրականացվող գործողությունները որքանով են քաղաքական և որքանով են իրավական»,-մանրամասնեց Բաբայանը։

Նրա խոսքով, բոլորին շատ լավ հայտնի է իր նկատմամբ հարուցված քրեական գործի բուն իմաստը, հենց սկզբից հայտնի էր, որ այն քաղաքական է։

«Քաղաքական իշխանությունը մինչև քրեական գործերի շարք սկսելը ի սկզբանե քաղաքական նպատակը հայտարարել էր  Սահմանադրական դատարանի ինչ-որ փոփոխություններ՝ սկսած ՍԴ նախագահից։ Հետևաբար, բոլոր այն գործողությունները, որոնք իրենց մեջ կպարունակեն իրավական որոշակի հիմնավորումներ, այնուամենայնիվ, ելնում են քաղաքական նպատակից»,-ասաց նա։

Անդրադառնալով հարցին՝ թե իր նկատմամբ հետապնդումները իրավակա՞ն են, թե՞ քաղաքական, Բաբայանն արձագանքեց,  եթե այդ գործողություններն իրավական ու իրավաչափ չեն, ապա քաղաքական են։

«Սկսած քրեական գործ հարուցելու որոշումից, որը հարուցվել էր Քրեական օրենսգրքի 314 հոդվածի հատկանիշներով, ոչ իրավաչափ գործողություն էր։ Չէր կարող նման որոշում լինել այն պարզ պատճառով, որ «Համաներման մասին» ՀՀ օրենքի 2-րդ հոդվածի 5-րդ մասի 1-ին կետով նախատեսվում է, որ քրեական գործ չպետք  է հարուցվի այն արարքների համար, որոնք սահմանում են մինչև 4 տարի ազատազրկում, իսկ հարուցված քրեական գործերը պետք է կարճվեն, քրեական հետապնդումները պետք է դադարեցվեն»,-ասաց Բաբայանը։

Մասնագիտությամբ իրավաբան Բաբայանը պնդում է, քրեական գործ հարուցվել չէր կարող, իսկ դրան հաջորդած ձերբակալությունը խայտառակ ապօրինություն էր, խայտառակություն։

«Նման գործաղություն չէր կարող ընդհանրապես տեղի ունենալ, եթե նկատի ունենք, որ ձերբակալության հիմքում դրվել է թաքնվելը։ Հիմա հարց է առաջանում, մի արարք, որը չի նախատեսում պատիժ, քանի որ «Համաներման մասին» օրենքով հստակ արգելված է պատժի սահմանումը, ո՞վ պետք է փախներ ու ինչի՞ պետք է փախներ»,-ընդգծեց Բաբայանը՝ ավելացնելով, որ «Համաներման մասին» ՀՀ օրենքն ամենևին էլ չի հետաքրքրում։

Անդրադառնալով ՀՔԾ պետի այն հայտարարությանը, թե Արսեն Բաբայանը չի պնդել, որ իր նկատմամբ կիրառվի  համաներում, բանախոսը հայտարարեց. «Նախ որևէ մեկն ինձ չի էլ հարցրել, երկրորդ՝ ես չունեմ նման պարտավորություն որևէ բան պնդելու կամ ասելու։ Համաներման ակտով նախատեսված պարտականությունները վարույթն իրականացնող մարմնի համար են, իրենք պետք է չանեին»։