Ձեր վստահելի աղբյուրը

Խորհրդարանն այսօր երկրորդ ընթերցմամբ և ամբողջությամբ ընդունեց «Բարգավաճ Հայաստան» կուսակցության պատգամավոր Միքայել Մելքումյանի հեղինակած «Ջրօգտագործողների ընկերությունների և ջրօգտագործողների ընկերությունների միությունների մասին» օրենքում փոփոխություններ և լրացումներ կատարելու մասին օրենքի նախագիծը՝ 71 կողմ, 3 դեմ, 12 ձեռնպահ ձայների հարաբերակցությամբ։

Կառավարության կողմից ներկայացված ՀՀ  քրեական օրենսգրքում փոփոխություն և լրացումներ կատարելու մասին և Վարչական իրավախախտումների վերաբերյալ Հայաստանի Հանրապետության օրենսգրքում լրացում կատարելու մասին օրենքների նախագծերի փաթեթն ընդունվեց ամբողջությամբ՝ միաձայն։

Երկրորդ ընթերցմամբ և ամբողջությամբ միաձայն ընդունվեց ՀՀ քրեական դատավարության օրենսգրքում փոփոխություններ և լրացումներ կատարելու մասին օրենքի նախագիծը։

Առաջին ընթերցմամբ կրկին միաձայն ընդունվեց կառավարության կողմից ներկայացված ՀՀ քրեական դատավարության օրենսգրքում լրացում կատարելու մասին օրինագիծը։

Տարածքային կառավարման մասին և կից ներկայացված օրենքների նախագծերի փաթեթը ևս ընդունվեց ամբողջությամբ՝ 81 կողմ, 14 դեմ ձայների հարաբերակցությամբ։

«Սնանկության մասին» ՀՀ օրենքում փոփոխություններ և լրացումներ կատարելու մասին և կից ներկայացված օրենքի նախագծերի փաթեթը ևս ընդունվեց առաջին ընթերցմամբ։

«Պետական կառավարման համակարգի մարմինների մասին» օրենքում փոփոխություն և լրացում կատարելու մասին և «Կառավարչական իրավահարաբերությունների կարգավորման մասին» օրենքում փոփոխություն կատարելու մասին օրենքների նախագծերի փաթեթն առաջին ընթերցմամբ անցավ միաձայն։

Երկրորդ ընթերցմամբ քվեարկության դրվեց «Մաքսային ծառայության մասին» ՀՀ օրենքում փոփոխություններ կատարելու մասին և կից ներկայացված օրենքների նախագծերի փաթեթը, որն ընդունվեց 98 կողմ, 1 դեմ և 3 ձեռնպահ ձայների հարաբերակցությամբ։

Առաջին ընթերցմամբ՝ 85 կողմ, 13 դեմ ձայների հարաբերակցությամբ ընդունվեց «Ֆինանսական համահարթեցման մասին» ՀՀ օրենքում փոփոխություններ կատարելու մասին օրենքի նախագիծը։