Ձեր վստահելի աղբյուրը

Աղետի գոտու բնակավայրերում երկրաշարժի հետևանքով անօթևան մնացած ընտանիքների բնակարանային խնդիրների լուծման նպատակով՝ կառավարությունը ֆահուստային ֆոնդից գումար կհատկացնի Շիրակի, Լոռու և Արագածոտնի մարզպետարաններին։

Քաղաքաշինության կոմիտեի նախագահի տեղակալ Արմեն Ղուլարյանը հայտնեց, որ ծրագրի շահառու ճանաչված 453 ընտանիքների բնակարանային խնդիրը դեռևս լուծման կարիք ունի և այդ ընտանիքների բնակապահովման հարցը նախատեսվում է լուծել 2020 թվականին:

Նրա խոսքով՝ այդ քաղաքացիների շրջանում հարցում է անցկացվել՝ նրանց կողմից նախընտրելի բնակարանի ապահովման տարբերակի վերաբերյալ։ Հարցմանը մասնակցած ընտանիքներից 227-ը (121-ը՝ Լոռու, 90-ը՝ Շիրակի և 16-ը՝ Արագածոտնի մարզերի գյուղական բնակավայրերում) նախընտրել է բնակարան ձեռք բերելու նպատակով վկայագրի միջոցով ֆինանսական աջակցություն ստանալու տարբերակը:

Այս նպատակով կառավարության պահուստային ֆոնդից կհատկացվի 1 մլրդ 291 մլն 600 հազար դրամ: Արմեն Ղուլարյանը հայտնեց, որ գումարը կհատկացվի մինչև տարեվերջ:

Վարչապետ Նիկոլ Փաշինյանն անդրադառնալով որոշմանը՝ նշեց, որ այս պահի դրությամբ Հայաստանում կա 1988 թ-ի երկրաշարժից տուժած 453 ընտանիք, որոնց նկատմամբ բնակարանով ապահովելու պետության պարտականությունը դե յուրե արձանագրված է:

«Քաղաքական խնդիր էինք դրել, որ հնարավորինս արագ լուծենք մեր հայրենակիցների հարցը։ 2020 թ-ի բյուջեում այս նպատակով հատկացվող գումարները մոտ 6 անգամ ավելացրել ենք: Հաջորդ տարի այդ նպատակի համար նախատեսված է 3 մլրդ դրամ»,- հայտարարեց վարչապետը։

Նրա խոսքով՝ նախնական քննարկումների ժամանակ իրենք չէին կարծում, որ շատ ընտանիքներ կցանկանան բնակարանների շինարարությանը սպասելու փոխարեն վերցնել վկայագրեր ու պետական միջոցներով գնել բնակարաններ. «Արդյունքները սենսացիոն էին։ Այդ քաղաքացիները կեսը ցանկություն է հայտնել բնակարանային վկայագրի  ձեռք բերի բնակարան»։

Նիկոլ Փաշինյանը նշեց, որ վերջին տարիներին աղետից տուժածներին բնակարանով ապահովելու տեմպը եղել է տարեկան 40-45 ընտանիք:

«Այս որոշմամբ այդ տեմպը 4-5 անգամ ավելացնում ենք: Կմնա 226 ընտանիք և մենք ունենք ռեալ շանս հաջորդ տարվա բյուջեով այդ խնդիրը լուծել, ավարտել»,- ընդգծեց վարչապետը։

Նշվեց նաև, որ գումարը բնակիչներին տրվելու է միայն  ժամանակավոր կացարանն ազատելու, տնակները քանդելուց հետո:

Վարչապետի խոսքով՝ սա շատ կարևոր է, քանի որ Գյումրիում կան դեպքեր, երբ մարդիկ բնակարան են ստացել, իսկ տնակը վարձով են տվել. «Մենք դեմ չենք, որ մարդիկ հավելյալ եկամուտ ունենան, բայց այդ երևույթը Գյումրիի զարգացմանը խոչընդոտում է»։