Ձեր վստահելի աղբյուրը

Եվրոպական խորհրդարանի պատգամավորները նախօրեին արգելափակեցին Հունգարիայի կողմից ներկայացված ԵՄ ընդլայնման և հարևանության հարցերով թեկնածուի նշանակումը։

Եվրահանձնաժողովի բարձրագույն կազմը՝ ԵՄ գործադիր մարմինը, բաղկացած է 27 հանձնակատարներից, որոնցից յուրաքանչյուրը ներկայացնում է ԵՄ անդամ մեկ պետություն։ Ընդլայնման և հարևանության հարցերով հանձնակատարի պաշտոնը տրվել է Հունգարիային։
Եվրոպական հանձնաժողովի նոր նախագահ Ուրսուլա ֆոն դեր Լեյենը ներկայումս փորձում է ձևավորել 2019-2024 թվականների Եվրոպական հանձնաժողովի կազմը, որը պետք է հաստատվի Եվրախորհրդարանի կողմից: Նոր հանձնաժողովը նախատեսում էր սկսել աշխատանքը նոյեմբերի 1-ից, բայց այս ամսաթիվը հետաձգվեց մեկ ամիս անց այն բանից հետո, երբ խորհրդարանականները արգելափակեցին Ֆրանսիայի, Ռումինիայի և Հունգարիայի թեկնածուներին։ Այս մասին գրում է euronews-ը։

Եռյակը պետք է առաջադրեր նոր թեկնածուներ Բրյուսելին, և Եվրախորհրդարանը տվեց իր կարծիքը նախօրեին՝ նոյեմբերի 14-ին․ Ռումինիայի և Ֆրանսիայի թեկնածուները հաստատվեցին։ Եվրոպական խորհրդարանն արգելափակել էր նաև Հունգարիայի առաջին թեկնածու Լասլո Տրոչանիի թեկնածությունը։

Հունգարիայի հանձնակատարի թեկնածու Օլիվեր Վարհելին չանցավ առաջին լսումով, ինչը նշանակում է, որ նա ստիպված է լինելու պատասխանել ևս մի շարք հարցերի՝ մինչ նրա թեկնածությունը կհաստատվի։

Վարեհլին պատգամավորներին վրդովեցրել էր Հունգարիայի կառավարությունից իր անկախության և Վիկտոր Օրբանի վարած քաղաքականության մասին իր պատասխաններով:

Եվրախորհրդարանի որոշ անդամներ, ինչպես ասվում է Եվրախորհրդարանի հաղորդագրության մեջ, «բարձրաձայնում են լուրջ մտավախություններ այն մասին, թե ինչպես Վարհելին կկարողանա նպաստել հարևանության երկրներում օրենքի գերակայությանն ու հիմնարար իրավունքներին, հաշվի առնելով, որ իր սեփական երկիրը՝ Հունգարիան, վերջին տարիներին հստակ օրենքներ է ընդունել, որոնք հակասում են ԵՄ պայմանագրերին։ Մի մասն էլ մտահոգություն է հայտնել, թե հանձնակատարի աշխատելու է հավատարիմ լինելով իր կառավարությանը՝ Հունգարիային, թե Եվրամիությանը՝ որպես ամբողջություն»։

Չնայած թեկնածուն մի քանի անգամ կրկնել է, որ կաշխատի Օրբանից անկախ՝ որպես ԵՄ հանձնակատար, պատգամավորները դեմ են քվեարկել նրա թեկնածությանը՝ 30 կողմ, 36 դեմ ձայների հարաբերակցությամբ:

Նշենք, որ ԵՄ ընդլայնման և հարևանության հարցերով հանձնակատարի պաշտոնում ներկայացված անձը կարևոր է նաև Հայաստանի համար, որի հետ երկիրը պետք է աշխատի։

Հիշեցնենք նաև, որ Հայաստանը Հունգարիայի հետ դիվանագիտական հարաբերությունները կասեցրել է 2012թ․-ի օգոստոսի 31-ին, երբ Հունգարիան Ադրբեջանին արտահանձնեց Բուդապեշտում հայ սպա Գուրգեն Մարգարյանին կացնահարելով սպանելու համար հունգարական դատարանի կողմից ցմահ ազատազրկման դատապարտված Ռամիլ Սաֆարովին։