Ձեր վստահելի աղբյուրը

«Այստեղ բոլոր խմբակցությունների միջև կա կոնսենսուս՝ մինուս մեկ։ Ես առաջին իսկ օրից դեմ եմ եղել այս կարգով այս հանձնաժողովի ձևավորմանը»,- Կոռուպցիայի կանխարգելման հանձնաժողովի անդամների ընտրության հարցի քննարկման ժամանակ հայտարարեց պատգամավոր Արման Բաբաջանյանը։

Նրա խոսքով՝ հանձնաժողովի խորհրդի ամենաառանցքային թերությունը, բացը մրցութային կարգի չեզոքացումն է։

«Հանձնաժողովի խորհրդի կազմի ընտրության գործընթացում դուրս մնաց մրցակցային սկզբունքի կիրառման պահանջը, ինչի արդյունքում հանձնաժողովը ձևավորվում է իշխանության գերակայության սկզբունքի հիման վրա: Արդյունքում հանձնաժողովի և խորհրդի կազմից դուրս են մնում քաղհասարակության ներկայացուցիչները, որոնք անուրանալի դեր ունեն մեր երկրում կոռուպցիայի դեմ պայքարի գործընթացում։ Առանց հանրային միավորների մասնակցության մենք չենք կարող արդյունավետ կերպով կանխարգելել կոռուպցիան: Ըստ էության մենք խախտում ենք ժողովրդավարության մի շարք սկզբունքներ՝ մրցակցության, մասնակցողականության, ներկայացուցչականության և հաշվետվողականության»,-ասաց պատգամավորը:

Նրա խոսքով՝ ունենալու են հակակոռուպցիոն հերթական անդեմ մարմինը, որը գործելու է իշխանության համար քաղաքական կոնյունկտուրայից ու քաղաքական նպատակահարմարությունից ելնելով:

«Խորհուրդն ամբողջությամբ քաղաքականացված է, ինչը սկզբունքորեն հակասում է այս ինքնավար մարմնի բնույթին, էությանը և դրանում քաղհասարակության ներկայացուցիչների բացակայությունը վերացնում է հակակշիռների ու փոխզսպումների հնարավորությունը»,- հավելեց Բաբաջանյանը։

Նշենք, որ խորհրդարանում Կոռուպցիայի կանխարգելման հանձնաժողովի անդամների ընտրությունը տեղի կունենա վաղը՝ ժամը 12-ին։