Ձեր վստահելի աղբյուրը

Նախօրեին շրջակա միջավայրի նախարար Էրիկ Գրիգորյանը, մի քանի պաշտոնյաներ ու պատգամավորներ հանդիպել են ջերմուկցիների ու գնդեվազցիների հետ: Panorama.am-ի հետ զրույցում քննարկմանը ներկա Ջերմուկի բնակիչ Արմեն Խաչատրյանն ասաց, որ իրենք շարունակել են պնդել իրենց դիրքորոշումը՝ շարունակելու են հսկողությունը, պոստերը չեն բացելու մինչև չլսեն իրենց ցանկալի հայտարարությունը:

«Երկար-բարակ սիրուն խոսում են, բայց դա մեզ ի՞նչ: Շարունակելու ենք պայքարը: Մենք ընդամենը մեր դիրքորոշումը հայտնեցինք, որ չենք դադարեցնելու պոստերի ապաշրջափակումը,  մինչև կառավարությունը հայտարարի, որ «Լիդիանի» գործունեությունը ժամանակավորապես դադարեցվում է: Էլի թող իրենց հետազոտությունները շարունակեն, ձևը գտնեն, բայց պետք է հայտարարություն անեն, որ այդ մարդիկ կարողանան պոստերից դուրս գան: Մինչև պետական մակարդակով նման հայտարարություն չլինի, պոստերը չեն բացվելու»,- ասաց նա:

Ա. Խաչատրյանի խոսքով, միակ նորությունը, որ լսել են քննարկմանը՝ հաջորդ տարի բավականին թանկ սարքեր են գնելու մոնիթորինգ իրականացնելու համար՝ քամու ուղղությունը, ջրի որակը որոշելու համար:

«Երկար գործընթաց է: Հստակ ժամկետ էլ չկարողացան նշել, չգիտեին էլ՝ երբ է լինելու, անորոշ ժամկետ են նշում՝ հաջորդ տարի»,- ասաց Ջերմուկի բնակիչը:

Միաժամանակ Ա. Խաչատրյանն ընդգծեց, որ իրենց համար այս պահին ամենակարևոր հարցն է՝ ժամանակավորապես լուծում գտնել, որ մարդիկ դուրս գան պոստերից:

«Մենք հենց բացենք, «Լիդիանը» կուզի ներսի մտնի: Քանի պետությունը չի հայտարարել, որ «Լիդիանի» լիցենզիան թեկուզ ժամանակավոր դադարեցվում է, «Լիդիանը» տարածք մտնելու իրավունք չունի, ապաշրջափակում չի լինելու»,- ասաց նա:

Հարցին՝ կարելի՞ է ասել, որ հերթական ոչինչ չտվող հանդիպում էր, Ա. Խաչատրյանն ասաց. «Այո, մեծ հաշվով կարելի է…»:

Ինչ վերաբերում է նոր քննարկում կազմակերպելուն և արդյո՞ք նման պայմանավորվածություն կա, նա նշեց. «Ոչ: Ախր ինչ քննարկենք, քննարկելու բան չկա: Ջերմուկ համայնքի դիրքորոշումը միանաշանակ է, ուղղակի փակելու ձևը պետք է գտնեն: Մեր դիրքորոշումը չի փոխվելու: Այստեղ հարցը բնապահպանական չէ: Իհարկե, կարևոր է բնապահանության հարցը, բայց այլ կարևոր բան կա. մենք չենք ուզում այս քաղաքը տուրիստական առողջարանային քաղաքից դառնա հանքարդյունաբերական բանավան: «Լիդիանի» հետ երկու տարի ապրել ենք նույն քաղաքում, տեսել ենք իրենց լկտի պահվածքը, ամեն վատ երևույթները, Ջերմուկի դեմոգրաֆիան փոխվել էր, խնդիրները շատացել էին: Այս քաղաքին հարիր չէ դա: Ջերմուկը չի ուզում իր զարգացման ուղղությանը փոխի: Մեզ համար խնդիրն ավելի շատ սոցիալական է, քան բնապահպանական: Մենք բնապահպաններ չենք, մենք բնակիչներ ենք, ուզում ենք ապրել այնպես, ինչպես արդեն 60-70 տարի ապրել ենք: Մեր պապերը եկել են այստեղ, այսպիսի քաղաք են սարքել,  չենք ուզում դառնա հանքարդյունաբերական քաղաք»,- ասաց ջերմուկցի Արմեն Խաչատրյանը: