Ձեր վստահելի աղբյուրը

Դասախոսները, մտավորականները հանդիպում են կրթության, գիտության, մշակույթի և սպորտի նախարար Արայիկ Հարությունյանի հետ: Հիշեցնենք, որ դասախոսները դժգոհ են ԿԳՄՍ նախարարության կողմից  մշակված «Բարձրագույն կրթության և գիտության մասին» նոր նախագծից, որի համաձայն, բուհերում «Հայոց լեզու և հայ գրականություն» և «Հայոց պատմություն» առարկաների դասավանդումը պարտադիր չի լինելու:

Դասախոսները ներկայացրեցին իրենց առաջարկները: Մասնավորապես ԵՊՀ  հայոց լեզվի ամբիոնի վարիչ Յուրի Ավետիսյանն ասաց, որ  մինչև օրենքի նախագծի ընդունումն արդեն ԶԼՄ-ներով  հստակ քարոզվում է  այն գաղափարը, որ ինժեներներն, այսինքն  բուհում սովորող ապագա ինժեներին բնավ պետք չէ ուսուցանել հայերեն,  հայերենի դասվանդումն անհարկի ծանրաբեռնում է ուսանողներին ավելորդ ժամանակով,  դպրոցում ստացած գիտելիքը բավարար է լավ տեխնոկրատ լինելու համար:

«Այսօրինակ քարոզչության ճնշող պայմաններում վտանգները բացառելու միակ ողջամիտ ճանապարհը, մեր կարծիքով, մնում է այն, որ  նոր օրենքում վերստին ամրագրվի  Հայց լեզվի ուսուցման  պարտադիր լինելու հանգամանքը»,- ասաց նա:

ԵՊՀ Հայոց պատմության ամբիոնի վարիչ Արտակ Մովսիսյանը նշեց, որ իրենք բարիկադի երկու կողերում կանգնած մարդիկ չեն:

«Ի վերջո բոլորի նպատակը պետք է լինի լավ կրթական, գիտական համակարգ ունենալը, երեխաների համար նորմալ միջավայր ստեղծելը, ոչ թե, վերջին հաշվով, այսօր ով է նախարար, ով է ռեկտոր, ով սովորական դասախոս:  Տարիուկես առաջ դուք էլ մեր կարգավիճակին դասախոս էիք, և այստեղ ավելի շատ պետք է կոլեգիալ, բարեկամական մթնոլորտն իշխի, քան դիրքավորումը»,- ասաց Ա. Մովսիսյանը:

Նա նշեց, որ իրենց մտահոգում է այն, որ ամբողջ 42 էջանոց  նախագծում ընդամենը 11 տող է հատկացված Գիտությունների ազգային ակադեմիային,  ամենակենսական նշանակություն ոլորտներից կրթությունն ու գիտությունը մեկտեղվել են մի տեղ, որոնք հեչ մեկտեղելի չեն:

«Գիտությունների ազգային ակադեմիան ընդամենը  11 տողի արժանի բա՞ն է»,- հարցադրում արեց Ա. Մովսիսյանը:

Ներկաները լրացրեցին՝ «այնտեղ փակելու մասին է»:

ՀՀ ԳԱԱ Պատմության ինստիտուտի տնօրեն Աշոտ Մելքոնյանն ասաց, որ դպրոցն ավարտած շրջանավարտն, որն այսօր զինվոր է, «բոբիկ է գիտելիքից», փաստ է, որ ավագ դպրոցը որ չի կայացել:

«Բաներ կան, որ պետք է պարտադրել: Համոզված եմ, որ եթե օրենքի նախագծի այդ կետը մնաց, պարտադրանքը հանվեց, Հայոց պատմությունն ու Հայոց լեզուն բոլոր ֆակուլտետներից դուրս են գալու»,- ընդգծեց նա: