Ձեր վստահելի աղբյուրը

«Կոռուպցիայի կանխարգելման հանձնաժողովի անդամի թեկնածու լինելուն մեծ պատասխանատվությամբ եմ վերաբերվում, քանի որ քաջ գիտակցում եմ, թե ինչպիսի խնդիրներ կան ծառացած այս ոլորտում»,- այս մասին այսօր Ազգային ժողովում նշեց  Կոռուպցիայի կանխարգելման հանձնաժողովի անդամի պաշտոնում  «Բարգավաճ Հայաստան» խմբակցության կողմից առաջադրված Նարեկ Համբարձումյանը։

Հիշեցնենք, որ խորհրդարանում քննարկվում է Կոռուպցիայի կանխարգելման հանձնաժողովի անդամների ընտրության հարցը:

Նարեկ Համբարձումյանի կարծիքով՝ ներկա պայմաններում Հայաստանի որդեգրած հակակոռուպցիոն քաղաքականությունը պետք է ընդգրկի ոչ միայն անձեր և կառույցներ, այլ պետք է կրի համակարգային բնույթ, և բացառի կոռուպցիայի ցանկացած դրսևորում:

«Այս գործընթացում կարևորում եմ ՀՀ յուրաքանչյուր քաղաքացու ներգրավվածությունը պետական մարմինների՝ մասնավորապես Կոռուպցիայի կանխարգելման հանձնաժողովի և հասարակական կազմակերպությունների, քաղաքացիական հասարակության հետ համագործակցությունում»,-  ընդգծեց Նարեկ Համբարձումյանը:

Նրա խոսքով՝ որևէ մեկի համար գաղտնիք չէ, որ կոռուպցիան մեր երկրի զարգացմանը խոչընդոտող մեծագույն չարիք է և դրա դեմ պայքարի գործում, ըստ նրա, անհրաժեշտ է համախմբել բոլորի ջանքերը։ «Ես ինքս պատրաստ եմ իմ գիտելիքները ծառայեցնել պատասխանատու այս գործին»,- ասաց ԲՀԿ-ի թեկնածուն։

«Լուսավոր Հայաստան» խմբակցության կողմից առաջադրված  Հայկուհի Հարությունյանն էլ նշեց, որ  հանձնաժողովին իր անդամակցությունը բնորոշում է որպես քաղաքացիական պատասխանատվություն՝ իր և Հայաստանի քաղաքացիների առջև:

Նրա խոսքով՝ հանձնաժողովի գործունեությունը նաև քաղաքական պատասխանատվություն է Հայաստանի նոր իշխանության համար:

«Ես հավատում եմ, որ կոռուպցիայի դեմ պայքարի արմատախիլ անելու օրակարգը շարունակելու է մնալ առաջնահերթություն, որի շուրջ ձևավորված քաղաքական համերաշխությունը երբևէ այլ շահի առջև չի նահանջելու և չի դառնալու խմբակային շահերին ծառայող և հարմարեցված լծակ»,- ասաց Հայկուհի Հարությանյանը՝ հավելելով, որ կոռուպցիայի դեմ պայքարի և կանխարգելման գործում պատրաստ է ներդնել  իր կարողություններն ու տարիների փորձը։

Նա նաև նշեց, որ իր  համար շատ կարևոր է և խիստ նշանակալից, որպեսզի հանրության մեջ ձևավորվի կոռուպցիայի նկատմամբ զրո հանդուրժողականություն։