Ձեր վստահելի աղբյուրը

Վարչական դատարանն Ամուլսարի ծրագրի 2016թ. ապրիլի ՇՄԱԳ փորձագիտական եզրակացությունն ուժը կորցրած ճանաչելու վերաբերյալ ՀՀ շրջակա միջավայրի նախարարի դեմ ներկայացված հայցադիմումը մերժել է: Հայացադիմումի հեղինակ, փաստաբան, բնապահպան Նազելի Վարդանյանը Panorama.am-ի հետ զրույցում հայտնեց՝ ստացել են դատարանի որոշումը, ծանոթացել են հիմնավորումներին, դրանց հետ համաձայն չեն, անպայման բողոքարկելու են։

«Նորմալ գործընթաց է։ Եթե կա որոշում, ապա պետք է բողոքարկենք, դրա համար երեք ատյան կա»,-ասաց նա։

 Բնապահպանը դատարան ներկայացրած հայցում նշել է, որ ի հայտ են եկել նոր գործոններ,  դրանք ու  «Շրջակա միջավայրի վրա ազդեցության գնատման ու փորձաքննության մասին» օրենքը հիմք ընդունելով բնապահպանության նախարարը պետք է  փորձաքննական եզրակացությունն ուժը կորցրած ճանաչի։ Որպես նոր ի հայտ եկած գործոնների թվում Վարդանյանը նշել է  Հարութ Բրոնոզյանի կողմից պատվիրված Ամուլսարի ծրագրի անկախ փորձաքննության արդյունքները թթվային դրենաժի վերաբերյալ,  որը հաստատվել է «Էլարդ»-ի փորձաքննությամբ, ըստ որի, դրենաժի վտանգը նշված ու գնահատված չի եղել, նշել է՝ Միջազգային ֆինանսական կորպորացիայի եզրակացությունը, ըստ որի կենսաբազմազանության, Ջերմուկի, Գնդեվազի վրա ազդեցությունն ուսումնասիրված ու գնահատված չէ, ներկայացրել է Վայրի բնության հիմնադրամի եզրակացությունը, թե քանի տեսակ կենդանի ու բույսեր ներկայացված ու ուսումնասիրված չեն եղել 2016-ի փորձաքննության մեջ։

Բնապահպանն ընդգծում է՝ միգուցե այդ բույսերն ու կենդանիները փորձաքննություն ժամանակ չեն եղել, բայց հիմա կան ու այդ գործոնը պետք է հաշվի առնվի։

Վարդանյանը հայցում հիշատակել է նաև նախարար Էրիկ Գրիգորյանի գրությունը, որտեղ ներառված է 13 կետ։ 

«Դատարանը սխալ է մեկնաբանել օրենքը, գտել է, որ նոր հանգամանք պետք է ընդհանրապես գոյություն չունենա։ Նման բան չկա բնության մեջ։ Երկրաշարժն էլ նոր գործոն է։ Օրենքն ասում է, որ բոլոր գործոնները փորձաքննություն անցնեն, եթե փորձաքննությունից հետո նոր գործոններ են ի հայտ եկել, ապա նախորդ եզրակացությունը պետք է ուժը կորցրած ճանաչվի ու ՇՄԱԳ նոր փորձաքննություն իրականացվի, գնահատական տրվի։ Օրենքի ամբողջ իմաստը դա է, ու ոչ թե պետք է սպասենք, որ այլմոլորակայիններ գան ու դա համարենք նոր գործոն։ Եթե նման կերպ մեկնաբանվի հոդվածը, ապա դա նշանակում է, որ այդ դրույթը երբեք էլ չի կիրառվի։ Հետաքրքիր է, որ դատարանը նույն բանն է գել, ինչ որ «Լիդիան»-ի ներկայացուցիչն ասում է։ Տարօրինակ է, որ նույն-նույն բառերով է գրված, առանց հիմնավորումների»,-ընդգծում է Նազելի Վարդանյանը։

«Լիդիան Ինթերնեյշնլի» նախագահի և գլխավոր գործադիր տնօրենի ժամանակավոր պաշտոնակատար Էդվարդ Սելլերսը վարչական դատարանի որոշումը գնահատել  է այսպես. «Դատարանը հաստատեց ՇՄԱԳ-ի օրինականությունը»։

Նազելի Վարդանյանն ընդգծում է, հայցն ամենևին էլ օրինականության վիճարկման մասին չէր, դրա մասով առանձին դատավարություն է ընթանում, դրանք տարբեր հայցեր են։

«Հայցը, որի մասին խոսում ենք, 2016-ի փորձաքննության եզրակացության ճիշտ ու սխալ, օրինական ու անօրինական լինելուն չի վերաբերում։ Այն վերաբերում է նոր ի հայտ եկած գործոններին, որոնք էլ պետք է փորձաքննության ենթարկվեն։ Իսկ դրա համար պետք է, որ նախորդն ուժը կորցրած ճանաչի»,-մանրամասնեց նա։

Դատարան  ներկայացված հայցը «Լիդիան Ինթերնեյշնլ» ընկերությունը որակել էր որպես հերթական փորձերից մեկը՝ «խոչընդոտելու «Լիդիանի» օրինական իրավունքին՝ զարգացնելու և իրագործելու Ամուլսարի ծրագիրը»:

Դատարան դիմած փաստաբան, իրավաբանը նշում է՝ նրանք ինչ ուզում են, կարող են ասել։

«Եթե դատարանի որոշումը մեր օգտին լիներ, ընկերությունը բողոքարկեր, դա կնշանակեր, որ իրենք իրենց խոչընդոտո՞ւմ են։ Սա դատական քննություն է։ Կարող է երկրորդ ատյանը բեկանի ու հայցն ուղարկի առաջին ատյան, դա տևի տասը տարի, ի՞նչն է նշանակում, մենք խոչընդոտո՞ւմ ենք»,-ասաց նա՝ ներկայացնելով, որ մեկ ամսվա ընթացքում կբողոքարկեն դատարանի որոշումը։