Ձեր վստահելի աղբյուրը

«Աղբյուր»  մանկապատանեկան ամսագրի գլխավոր խմբագիր Թադևոս Տոնոյանը ահազանգել էր, որ կրթության, գիտության, մշակույթի և սպորտի նախարարության կողմից հայտարարած մրցույթում հաղթած «Խատուտիկ» ամսագրի նյութերում ուղղագրական ու կետադրական սխալներ կան, ինչպես նաև  նյութերի գերակշիռ մասը համացանցահենության արդյունք է, մինչդեռ պայմանագիրը սեփական նյութերի խիստ պահանջ էր նախատեսում: Հրապարակման մեջ նա մանրամասն մեջբերումներ է անում ակնհայտ սխալների վրա։

Panorama.am-ը մի քանի հարցով դիմեց նախարարությանը.

Panorama.am-.Ո՞վ է պատասխան տալու պայմանագրի այս էական կետը արհամարհելու համար: Նաև՝ ԿԳ  նախարարը 29.04.2019թ. ֆեյսբուքյան («Ազատություն» ռադիոկայան) հարցուպատասխանի ժամանակ հայտարարել է, որ այդ պարբերականները («Աղբյուր», «Կանչ», «Ծիծեռնակ») «տասնամյակներ շարունակ հենց էնպես  ֆինանսավորում են ստացել… »։  Նախարարության կողմից հայտարարված մրցույթի արդյունքում այժմ «Աղբյուր»  մանկապատանեկան ամսագիրը լույս չի տեսնում, դրա փոխարեն լույս է տեսնում սխալներով ու համացանցից հանված նյութերով  «Խատուտիկը»:

Նախարարության պատասխան.-Կրթության, գիտության, մշակույթի և սպորտի  նախարարության գլխավոր քարտուղարի ս/թ նոյեմբերի 7-ին համապատասխան գրությամբ «Խատուտիկ» ամսագրի գլխավոր խմբագրին հանձնարարվել է 3-օրյա ժամկետում պարզաբանում տալ ամսագրում տեղ գտած վրիպակների և սխալների վերաբերյալ:

Նկատենք՝ նոյեմբերի 7 + 3 օր կլինի նոյեմբերի 10, մենք այս ոչինչ չասող պատասխանը ստացել ենք նոյեմբերի 19-ին։ Այսինքն՝ նախարարության հանձնարարականը անտեսվել է, իսկ նախարարությունը նույնիսկ դա չի նկատել։

Panorama.am.- Որքանո՞վ է նման ամսագիրը նախարարի նախընտրությունը։

Նախարարության պատասխան.-Խոսք լինել չի կարող նախարարի նախընտրության մասին, քանի որ ՀՀ կրթության, գիտության, մշակույթի և սպորտի  նախարարությունը 2019 թվականին անցկացրել է նախադպրոցական և դպրոցական (կրտսեր, միջին և ավագ) տարիքի երեխաների համար նախատեսված ամսագրերի գնման մրցույթ «Գնումների մասին» ՀՀ օրենքի և ՀՀ կառավարության 04.05.2017 թ. թիվ 526-Ն որոշմամբ հաստատված «Գնումների գործընթացի կազմակերպման» կարգի պահանջներին համապատասխան:

Ինչպես կարող է խոսք չլինել նախընտրությունների մասին, եթե Հայոց լեզվի ոչ պարտադիր քաղաքականության հետ նախարարության մրցույթը հաղթում է հայերենը սխալներով գրող կազմակերպությունը։

Panprama.am. -Արդյո՞ք այսպիսի գործունեությունը «հենց էնպես  ֆինանսավորում ստանալ» և ֆինանսների մսխում չէ։ 

Նախարարության պատասխան.- Անդրադառնալով այս հարցին, որտեղ կարծիք եք հայտնում, թե պետական միջոցները մսխվում են, բացատրենք, որ այս տարվանից գործընթացը մտել է նոր փուլ, երբ առանց մրցույթի դրամաշնորհի հատկացման կամ նվիրաբերության պայմանագրերի փոխարեն պետական ֆինանսավորումը տրամադրվում է մրցութային կարգով:
Նախկինում մանկական և մանկապատանեական մամուլի ձեռք բերման համար ՀՀ պետական բյուջեից գումարների տրամադրման սուբսիդավորման եղանակը ենթադրում էր պարբերականների վաճառք Հայաստանի հանրակրթական դպրոցներում և բոլոր հրատարակիիչներին հավասար հնարավորություններ չէր տալիս մասնակցելու մանկական և մանկապատանեական մամուլի տպագրությանը: Շատ հաճախ պետական բյուջեից ֆինանսավորվող մանկական ամսագրերը տպագրվում էին ուշացումով, եղել են ամիսներ, որ դրանք ընդհանրապես չեն հրատարակվել, բացի այդ որևէ կերպ կանոնակարգված չի եղել դրանց տպաքանակի և որակի վերաբերյալ պահանջների հարցը:

Բացատրենք՝ սխալ գրելը գումարը աղբը նետելն է, ուշ լիներ, նուշ լիներ, ինչ ենք անելու մրցույթը, եթե հաղթողը տգետներ է դաստիարակում։ Բավարարվա՞ծ եք մեր բացատրությամբ։ 

Panorama.am. -Արդյո՞ք նախարարությունը նկատել էր նշված սխալները։ Ի՞նչ է պատրաստվում անել նախարարությունը:

Նախարարության պատասխան.-Այս երկու կետի վերաբերյալ տեղեկացնմում ենք, որ ԿԳՄՍ նախարարության և կատարողի միջև ստանձնած իրավունքներն ու պարտավորությունները կարգավորվում են երկկողմ պայմանագրերով:

Դա չէր մեր հարցը։

Panorama.am.-Ինչպե՞ս եք նայում փաստին, որ հենց նախարարության ընտրությամբ են սխալները տարածվում և ուրեմն՝ նախարարությունը դարձել է սխալներով գրելու քարոզի հեղինակ։

Նախարարության պատասխան. -«Խատուտիկ»-ի երրորդ համարը, որում տեղ են գտել ակնհայտ վրիպակներ և սխալներ, տպագրությունից առաջ սահմանված կարգով չի ուղարկվել համապատասխան հանձնաժողով, հետևաբար, դրանք ուղղելու հնարավորություն չի եղել, ինչպես դա արվել է նախորդ՝ երկրորդ համարի պարագայում:
Իսկ Ձեր գնահատականին ի պատասխան, թե «նախարարությունը դարձել է սխալներով գրելու քարոզի հեղինակ», նշենք, որ, սահմանված կարգի համաձայն, մրցութային պայմանները խախտած ընկերությունները կորակազրկվեն, և 2020 թվականի համար եկող ամիս հայտարարվելիք մրցույթին մասնակցելու հնարավորություն չեն ունենա:

Պահանջեիք վնասի փոխհատուցում, հետ կանչեիք տպագրությունը։ Կարծում ենք այս ամենը կշարունակվի, քանի դեռ Կրթության նախարարությունը չի սովորել պատասխանել հարցերի, ուրեմն՝ չի տեսնում խնդիրները ու չի կարողանում պայմանագրեր կազմել։