Ձեր վստահելի աղբյուրը

Միլանի Հայ Առաքելական Սուրբ Քառասուն Մանկունք եկեղեցում հայ համայնքի ներկայացուցիչների հետ հանդիպմանը ՀՀ վարչապետ Նիկոլ Փաշինյանը հայտարարեց, որ իրենք «ոչ մի բանի առաջ չեն կանգնելու»:

«Ես հրաժարականի մասին մտածելու կարիք չունեմ այնքան ժամանակ, քանի ունեմ Հայաստանի Հանրապետության ժողովրդի վստահությունը: Իսկ երբ որ չունենամ ժողովրդի վստահությունը, որևէ մեկին չեմ թողնի, որ նույնիսկ ակնարկի դրա մասին՝ րոպե առաջ, որովհետև վարչապետը, որը չունի ժողովրդի վստահությունը, անկախ անձերից, չարիք է երկրի համար: Ղեկավարը, որը չունի երկրի վստահությունը, ժողովրդի վստահությունը, անկախ անձերից, չարիք է երկրի համար այնպես, ինչպես, կներեք, չարիք են եղել երկրի բոլոր ղեկավարները՝ սկսած 1996 թվականից, երբ առանց ժողովրդի վստահության տիրացել են իշխանությանը և փորձել են պահել այդ իշխանությունը: Մեր օրոք այդպիսի իշխանություն և այդպիսի իրավիճակ չի լինելու»,- ասել է նա:

Հիշեցնենք՝ 1996 թ. սեպտեմբերի 22-ին Լևոն Տեր-Պետրոսյանի նախագահ վերընտրընտրվելը վիճահարույց էր՝ ըստ հրապարակված տվյալների ստացել էր քվեների 51.75%-ը։

Վարչապետ Փաշինյանը խիստ պնդեց, թե՝ իրենց հեղափոխությունը եղել է  սիրո և համերաշխության:

«Մենք քարոզում ենք սեր, ես ինքս, ինչպես մեր Տեր Հիսուս Քրիստոսն էր սեր քարոզում, բայց երբ որ եկավ ժամանակը, նա մտավ տաճարի տարածք և շուռ տվեց սեղանները՝ ասելով, որ այս սրբության տաճարը դուք դարձրել եք առևտրի և դալալության միջավայր: Նույնիսկ Հիսուս Քրիստոսը մտավ տաճար և շուռ տվեց այն սեղանները, որտեղ պղծվում էին սրբությունները»,- ասաց Նիկոլ Փաշինյանը: