Ձեր վստահելի աղբյուրը

2020 թվականի պետական բյուջեի նախագծով գյուղատնտեսության ոլորտի ծախսերը նախատեսվում են 5 մլրդ 243.2 մլն դրամի չափով:

«Արցախպրես»-ի թղթակցի հաղորդմամբ՝ այս մասին այսօր Խորհրդարանում կայացած պետական բյուջեի ներկայացմանն ասել է ԱՀ ֆինանսների նախարար Արթուր Հարությունյանը:

Նախարարի խոսքով՝ շուրջ 1.5 մլրդ դրամը նախատեսվում է հատկացնել Գյուղի և gյուղատնտեսության աջակցության հիմնադրամին:

Հատկացված գումարներն հիմնականում ուղղվելու են տեղական ագրարային տնտեսությունների կողմից տարբեր ծրագրերի իրականացմանը, փոխառությունների տրամադրմանը, առևտրային բանկերի կողմից գյուղատնտեսական ծրագրերի համար տրամադրվող վարկերի մասնակի սուբսիդավորմանն ու մի շարք այլ ծրագրերի իրականացմանը:

600 մլն դրամ նախատեսվում է հատկացնել ջրախնայողական տեխնոլոգիաների՝ մասնավորապես կաթիլային համակարգերի տեղադրման աշխատանքներին: 400  մլն դրամ կհատկացվի արտեզյան ջրհորների կառուցմանն ու վերանորոգմանը և 600 մլն դրամ՝ գարնանացան մշակաբույսերի ցանքաշրջանառության խթանման ծրագրերին:

«Գյուղատնտեսության ոլորտի ընթացիկ վիճակագրությունը բարելավելու,  գյուղատնտեսության վերաբերյալ վիճակագրական տվյալների ամբողջական համակարգ, ինչպես նաև գյուղատնտեսական գործունեությամբ զբաղվող սուբյեկտների վիճակագրական ռեգիստրներ ձևավորելու և գյուղատնտեսության՝ որպես ձեռնարկատիրության առավել մանրամասն կազմն ու կառուցվածքը հստակեցնելու նպատակներով 2020 թ.-ին նախատեսվում է իրականացնել գյուղատնտեսության համատարած հաշվառում, որի կազմակերպման համար 2020 թ.-ի պետական բյուջեի նախագծով նախատեսվել է հատկացնել 223.4 մլն դրամ»,- նշել է Ա. Հարությունյանը: