Ձեր վստահելի աղբյուրը

«Խնդիրներ ունենք հանրակրթական դպրոցներում, տարվող կրթական քաղաքականության, ընդունելության քննությունների  հետ: Կարծում ենք՝ այս խնդիրները դեռ չլուծված  Հայոց լեզու և գրականություն, Հայոց պատմություն առարկաների՝ բուհերում ոչ պարտադիր դարձնելը  որպես բարեփոխում, տրամաբանական չէ»,-լրագրողների հետ հանդիպմանն ասաց ԵՊՀ ուսանողական ծրագրերի համակարգող Էդվարդ Գալստյանը , ով միացել է դասադուլ անող ուսանողներին՝ բողոքելով կրթության, գիտության, մշակույթի և սպորտի նախարարության կողմից  մշակված «Բարձրագույն կրթության և գիտության մասին» նոր նախագծի դեմ:

Նա նշեց, որ ԵՊՀ բոլոր ֆակուլտետներում այժմ այդ առարկաների դասավանդումը բուհերում պարտադրված է օրենքով, սակայն  չեն դասավանդվում  ամբողջական արդյունավետությամբ, ծրագրերի փոփոխություն է անհրաժեշտ:

«Այս խնդիրները տեսնում ենք, սակայն դա չի նշանակում, որ այս երկու առարկաները պետք է դուրս բերեն պարտադիր դասավանդվող առարկաների ցանկից: Հայաստանի համար պատրասվող մասնագետները  պետք է տիրապետեն Հայոց լեզվին և գրականությանը, Հայոց պատմությունը գոնե բավարար մակարդակով»,- ասաց Է. Գալստյանը:

Նա նշեց, որ պահանջ-խնդրանքով դիմել են ԵՊՀ ռեկտորի պաշտոնակատարին և գիտական խորհրդին՝ հրավիրել արտահերթ նիստ քննարկելու այդ օրենքի նախագծի կոնկրետ հայագիտական առարկաներին վերաբերող կետերը: Նրա խոսքով, այժմ թեև դասադուլը դադարեցված է՝  հետևելով իրենց դասախոսների կոչին, սակայն շարունակում են տարաբնույթ հանդիպումներ հասարակության լայն  շերտերի ներկայացուցիչների հետ, ովքեր մտահոգ են այս խնդրով:

ԵՊՀ  բանասիրության ֆակուլտետի 4-րդ կուրսի ուսանող Գևորգ Գյուլումյանն ասաց, որ ծիծաղելի վիճակ է. «Հայաստանում անգլերենը,  ֆրանսերենը, ռուսերենը պարտադիր են, հայերենը՝ ոչ: Չեմ ուզում այստեղ միտում տեսնել, ուզում եմ տեսնել խնդրի խորքը չհասկանալու, չըմբռնելու երևույթ: Եթե միտում տեսնենք, լավ բան չի ստացվի»:

ԵՊՀ  բանասիրության ֆակուլտետի երկրորդ կուրսի ուսանողուհի Ամալյա Հարությունյանն ասաց, որ հայագիտական  առարկաները կամընտրության դաշտ մղելու հետ կապված ընտրությունը, ըստ օրինագծի,  կայանալու է  գիտխորհրդի միջոցով:

«Թող չհնչի այնպես, որ անվստահություն կա գիտխորհրդի նկատմամբ, բայց ինչքանո՞վ ենք վստահ, որ գիտխորհրդում կայացրած այդ որոշումը և ընդհանրապես շատ որոշումներ արտահայտում են ուսանողության կամքը»,- նշեց նա:

Ուսանողները նշում են, որ նախարարության կողմից կոմպրոմիսի գնալու քայլեր չեն տեսնում:

«Օրեր առաջ կայացավ դասախոսական անձնակազմի ու նախարարի  հանդիպումը: Այստեղ սպասելիքներն ու իրականությունը բախվեցին իրար: Հույս կար գոնե ինչ- որ կառուցողական մթնոլորտում զրույցը կընթանա,  կոմպրոմիսային տարբերակներ կգտնեն,  բայց կարելի է  ասել՝ ձախողվեց: Ոչ միայն մթնոլորոտը կառուցողական չեղավ, ըստ էության, հանդիպումն  ուղղված էր լարվածությունը մեղմելուն, բայց ունենք այն, ինչ ունենք. հենց բանակցության արդյունքում  ձևավորվեց լարվածություն»,- ասաց  Ամալյա Հարությունյանը:

Ուսանողներն ասացին, որ իրենք սպասում են մինչև կստանան դիմում-պահանջի պատասխանը, որը հավանաբար կլինի երկուշաբթի, որից հետո  կհայտարարեն իրենց անելիքների մասին: Միաժամանակ ընդգծեցին, որ իրենք պայքարը շարունակելու են, շատ ֆակուլտետների դեկաններ անվերապահորեն աջակցություն են հայտնել իրենց շարժմանը, այսինքն դեմ են հայագիտական առարակների կարգավիճակի փոփոխությանը: