Ձեր վստահելի աղբյուրը

ՀՀ կրթության, գիտության, մշակույթի և սպորտի նախարարության դիմաց օրեր շարունակ նստացույց անող ՀՅԴ երիտասարդական միության անդամները որոշել են դադարեցնել նստացույցը՝ սպասելով ԿԳՄՍ նախարար Արայիկ Հարությունյանի հետ հանդիպման:

«Մեր պահանջներն են՝ ԿԳՄՍ  նախարարությունը հրապարակի  կրթության, գիտության, մշակույթի և սպորտի ոլորտներում քաղաքականությունն ու այն առաջնահերթությունները, որով ինքն առաջնորդվում է: Մեր պահանջն է նաև «Հայոց եկեղեցու պատմություն» առարկան դասավանդվի դպրոցներում, հայագիտական առարկաները պարտադիր բաղադրիչով շարունակեն մնալ բուհական ծրագրում: Արայիկ Հարությունյանի հրաժարականի պահանջն ուժի մեջ է մինչև այլ հայտարարություն չլինի»,- երեկ երեկոյան հայտարարել է ՀՅԴ ՀԵՄ կենտրոնական վարչության անդամ Քրիստինե Վարդանյանը:

Նրա խոսքով, հաշվի առնելով փաստը, որ նախարար Ա. Հարությունյանը  Հայաստանում չէ, իրենց տեղեկություններով մեկ շաբաթով գտնվում է Եվրոպայում, պատրաստ են նրա վերադարձից հետո  ներկայացված պահանջների բավարարման շուրջ հրապարակային հանդիպում և քննարկում ունենալ նրա հետ:

«Խոսքն այստեղ հրապարակային հանդիպման մասին է»,- ընդգծեց Ք. Վարդանյանը:

Նստացույց անող երիտասարդները կարծում են, որ Արայիկ Հարությունյանը կգա իրենց հետ հանդիպման: Նրանք նշեցին, որ երկուշաբթի օրվանից նախարարության մոտ  չեն լինի. «Մտածում ենք նստացույցով դրած խնդիրը մինչ այս պահը լուծել ենք: Մեր կարծիքով, գոնե այս փուլում, նստացույց անելու կարիքը չկա: Կանցնենք այլ գործողությունների, որոնցից առաջինը նախարարի հետ այստեղ հրապարակային հանդիպումն է»:

Քրիստինե Վարդանյանը հիշեցրեց, որ ՀՅԴ Հայաստանի Երիտասարդական միությունը դիմել է ԱԺ ԼՀԿ և ԲՀԿ խմբակցություններին կրթության, գիտության, մշակույթի և սպորտի նախարար Արայիկ Հարությունյանին պաշտոնանկ անելու գործընթաց սկսելու վերաբերյալ:

«Երկու խմբակցություններից էլ պատասխանել են, որ խմբակցության նիստերում կքննարկեն,  կպատասխանեն: Եվս մեկ անգամ կոչ եք անում կուսակցություններին արտահայտել ժողովրդի լայն զանգվածների շահերը, բարձրացնել բնակչության հուզող հարցերը երկրի թիվ մեկ ամբիոնից»,- ասաց նա:

«Հրապարակ» թերթն այսօրվա համարում գրել է, որ խմբակցությունները, իրենց տեղեկություններով, ուսումնասիրել են առաջարկը և, ըստ ամենայնի, գրավոր կպատասխանեն ՀՅԴ-ականներին։

«Չնայած յուրաքանչյուր խմբակցություն ունի նախարարին անվստահություն հայտնելու օրենսդրական հնարավորություն, սակայն այս նստաշրջանում և՛ ԲՀԿ-ն, և՛ ԼՀԿ-ն կանգնած են հարցի լուծման տեխնիկական անհնարինության առջև։ Բանն այն է, որ այդ գործընթացը ժամանակատար է, օրենքով երկշաբաթյա ժամկետ է նախատեսված, որպեսզի նախ հարցապնդում ուղարկվի կառավարություն, որից հետո խորհրդարան ներկայացվի անվստահության նախագիծ, իսկ այս նստաշրջանի վերջին քառօրյան նշանակված է դեկտեմբերի 3-ին։

ԼՀԿ մեր աղբյուրներից տեղեկացանք, որ իրենք ընդհանրապես զրկված են այդ հնարավորությունից, քանի որ կանոնակարգ-օրենքը թույլ է տալիս, որ նստաշրջանի ընթացքում մեկ անվստահության նախագիծ ներկայացնի խմբակցությունը, իսկ ԼՀԿ-ն Ջանջուղազյանի վերաբերյալ արդեն ներկայացրել է։ Հետևաբար, խմբակցությունները, ըստ ամենայնի, պատասխանելու են, որ հաջորդ նստաշրջանի ժամանակ կքննարկեն Հարությունյանի հարցը»,- գրել է թերթը: