Ձեր վստահելի աղբյուրը

Ընտանեկան բռնության նվազեցման համար աշխատանքի և սոցիալական հարցերի նախարարությունն աշխատում է երկու ուղղությամբ. բռնության ենթարկված անձանց է աջակցության տրամադրումն է և  պետական ապաստարանների ստեղծումը։ Նոյեմբերի 25-ին նշվող Կանանց նկատմամբ բռնության վերացման միջազգային օրվա կապակցությամբ հրավիրված մամուլի ասուլիսում ասաց ՀՀ աշխատանքի և սոցիալական հարցերով նախարարի խորհրդական Օլգա Ազատյանը։

Նշվեց, որ  2020թ.-ի հունվարի 1-ից ՀՀ բոլոր մարզերում կգործեն ընտանեկան բռնության աջակցության կենտրոններ։ Յուրաքանչյուր մարզում կլինի առնվազն 1 կենտրոն, որտեղ բռնության ենթարկված մարդիկ կստանան հոգեբանական, իրավաբանական և այլ աջակցություն։

Երկրորդ, որ պատրաստվում է անել նախարարությունն այն է, որ բռնության ենթարկված անձանց համար ստեղծվի 2 պետական ապաստարան։ 2020թ.-ի հունվարից կլինի նաև ֆինանսական աջակցություն՝ կառավարության որոշմամբ ընտանեկան բռնության ենթարկվածը կարող է ստանալ 100-150 հազար դրամ։

Օլգա Ազատյանը նշեց, որ ընտանեկան բռնության կանխարգելման ուղղությամբ քաղաքականություն է մշակվում և վերջին ամիսներին արդեն շրջանառության մեջ է դրվել Ընտանեկան բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին ՀՀ օրենքում փոփոխությունների նախագիծը։  Նպատակն է բռնության ենթարկվածներին օգնել տարբեր մեխանիզմներով։

2020թ-ից Հայաստանում առաջին անգամ կիրականացվի նաև ընտանեկան բռնությունների դեպքերի կենտրոնացված հաշվառում, որը կօգնի ունենալ ճշգրիտ պատկեր բռնությունների տարածվածության, դեպքերի, դրանց տեսակների վերաբերյալ։