Ձեր վստահելի աղբյուրը

«Վերջերս հրապարակված տեսանյութը ապացուցողական բնույթ ունի, և դրա հիմքով պետք է շատ լուրջ քննություն ընթանա, ոչ թե ծառայողական քննություն։ Պետք է հարուցվի քրեական գործ, որովհետև քրեական հանցագործության հատկանիշներ կան։ Ես չեմ բացառում, որ այլ տեսանյութեր ևս կարող են հրապարակվել, որովհետև մեր երկրում անպատժելիության մթնոլորտ է տիրում»,- այս մասին լրագրողների հետ զրույցում ասաց  մարդու իրավունքների փորձագետ Մուշեղ Եկմալյանը՝ անդրադառնալով «Ոստիկանները հակագազով ու մահակով ցուցմունք են կորզում» վերտառությամբ աղմկահարույց տեսանյութին, որտեղ երևում է՝ ինչպես են քաղաքացիական հագուստով ոստիկանները «խոշտանգում» քաղաքացուն։

«Հելսինկյան ասոցիացիա» իրավապաշտպան ՀԿ նախագահ Նինա Կարապետյանի խոսքով, հրապարակված տեսանյութը բացառիկ էր հանրության համար, սակայն իրենք տարիներ շարունակ հենց դրա մասին էին ահազանգում. «Այն, ինչի միջով անցնում են խոշտանգված անձինք, ուղղակի տեսանելի դարձավ։ Հասկանալի է, որ այն ավելի ծանր ընկալվեց, քան իրավապաշտպանների խոսքը։ Սակայն սա նույնքան ապացույց է, ինչքան վկաների ցուցմունքներն ու փորձագիտական եզրակացությունները։ Բայց խոշտանգումները միշտ մնացել են անարձագանք, որովհետև այդ համակարգերում, որտեղ տեղի են ունեցել հանցագործությունները, ներսի աշխատակիցները եղել են այն քրեական մշակույթի կրողները, որի մասին մենք հիմա խոսում ենք։ Ուսադիր կրողները երբեք մեկը մյուսի դեմ ցուցմունք չեն տվել. դա համարվել է ուսադրի պատիվ։ Նույնը կատարվել է հատուկ քննչական ծառայությունների քննիչների կողմից. արդյունքում՝ գործը չի բացահայտվել»։

Նինա Կարապետյանի խոսքով, տարիներ շարունակ Հայաստանում հայտարարում են, որ խոշտանգմներ չեն արձանագրվել, դրանք խոշտանգման փաստի հիմա վրա հարուցված քրեական գործերի կարճման  հետևանք են. «Գործերը կարճվել են, քանի որ խոշտանգման փաստի վերաբերյալ բավականաչափ ապացույցներ հավաքել չի հաջողվել։ Իսկ վատագույն տարբերակով, բողոք բերած անձը կարող էր ենթարկվել քրեական պատասխանատվության՝ սուտ մատնության համար»։

Ոստիկանության պետի պաշտոնակատար Արման Սարգսյանի հանձնարարությամբ՝ Ներքին անվտանգության վարչությունում ստուգումներ են իրականացվում, իսկ Ճամբարակի բաժնի պետի լիազորությունները ժամանակավորապես դադարեցվել են։ Ոստիկանության արձագանքը իրավապաշտպան Ռոբերտ Ռևազյանը գնահատում է նվազագույն. «Տարիներ շարունակ քննությունների արդյունքները կոծկվում էին։ Բայց ենթաօրենսդրական դաշտում խնդիրներ ունեինք։ Օրինակ, հատուկ քննչական ծառայությունը ուզում էր գործը քննել, և օպերատիվ հետախուզական գործողությունները կրկին ոստիկանին էր հանձնարարվում։ Ես շատ մեծ կասկածներ ունեմ, որ այդ գործողությունների արդյունքում շատ փաստեր և հանգամանքներ կարող էին ընդհանրապես կոծկվել կամ վերացվել։ Եթե մենք հաշվենք, թե Հայաստանում խոշտանգման համար քանի գործ է հարուցվել ու Եվրոպական դատարանը Հայաստանի կողմից Կոնվենցիայի 3-րդ հոդվածի քանի խախտում է ճանաչվել, Եվրոպական դատարանի գործերը ավելի գերակշիռ կլինեն, քան ներպետական ատյանինը։ Սա աննորմալ վիճակ է, սա խոսում է պետության ձախողման մասին։ Այդ ուղղությամբ որևէ բան տեղի չի ունենում։  Ասեմ ավելին՝ նույնիսկ կան հիմնավոր կասկածներ կոնկրետ անձի վերաբերյալ, որ նրա կողմից խոշտանգում է տեղի ունեցել. դրան ոչինչ չի հետևում՝ որևէ մեկը պաշտոնից չի ազատվում, որևէ մեկը հրաժարական չի տալիս»։